Алдарт жүжигчин Лиам Нисон өнөөдөр 72 нас хүрч байна
Лиам Жон Нисон 1952 оны 6-р сарын 7-нд Умард Ирландын Бэллимен хотод ердийн сургуулийн манаач, тогооч хоёрын гэр бүлд төржээ. Хүүхэд байхдаа Нисон боксоор хичээллэж, залуудаа жолооч, цахилгаан шатчин зэрэг янз янзын ажил хийж явсан байдаг.
Хэд хэдэн туслах дүрд тоглосныхоо дараа тэрбээр 1990 онд “Харанхуй дундах хүн” киноны гол дүрд тоглосон бол 1993 онд “Шиндлерийн бүртгэл” кинонд тоглосноор “Оскар”-ын шагналд нэр дэвшиж, жинхэнэ од болсон байна. “Майкл Коллинз” , “Кинси” , “Хулгайлагдсан нь”, “Оддын дайн”, “Саарал” гэхчилэн түүний тоглосон бараг бүх кино хит болдог.
Тэрбээр 1994 онд Английн кино найруулагч, жүжигчин Наташа Ричардсонтой гэрлэж Майкл, Даниел гэх хоёр хүүтэй болсон юм. Харамсалтай нь 2009 онд гэргий нь цанаар гулгаж байх үедээ бэртэж, эл бэртлийнхээ улмаас нас баржээ. Тэрбээр эхнэрээ нас барснаас хойш өнөөг хүртэл ганц бие яваа.
Лиам Нисон өнөөдрийг хүртэл дэлгэцийн 189 уран бүтээлийн гол болон туслах дүрд тогложээ. Мөн “Нарниягийн түүхүүд” киноны Асланы дүрд, “Monster Calls” киноны гол мангасын дүрд дуу оруулж байжээ. Тэрбээр “Оскар”, “Алтан бөмбөрцөг”, “Тони” гэхчилэн томоохон кино наадмуудад тоглосон дүрүүдээрээ нэр дэвшиж, гурван удаа “Алтан бөмбөрцөг” хүртэж байв. Өдгөө бүх цаг үеийн шилдэг 100 жүжигчний жагсаалтанд нэр нь багтдаг бөгөөд мөн Ирландын хамгийн агуу кино жүжигчдийн жагсаалтад 7 дугаар байранд эрэмбэлэгддэг.
