Анне Франк амьд байсан бол өнөөдөр 95 нас хүрэх байлаа
Анне Франк нь 1929 онд Отто болон Эдит Франкын 2 дахь охин болж Германд төржээ. 1933 онд Гитлер сонгуульд ялж, арьсны үзэл даамжрах болсноор тэднийх Голланд руу дүрвэжээ. Гэтэл 1940 онд Герман Голланд руу довтолж эхэлсэн байна. 1942 онд Аннегийн эгч Марготыг хорих лагерьт явуулах зарлан ирсэн тул аав нь компанийнхаа дээврийн хөндийд найзынхаа гэр бүлийн хамт хоргодож эхэлжээ.
Анне өөрийнхөөрөө, хэлэх гэснээ шууд хэлдэг, үзэл бодолдоо хатуу зогсдог, шударга, хөгжүүн зантай хүүхэд байж. Дээврийн хөндийд нуугдаж амьдарсан 2 жилийн хугацаанд тэрбээр түүх судалж, франц хэлээ сайжруулан, тэмдэглэлээ хөтөлж байжээ. Харамсалтай нь, 1944 онд гэр бүлийнх нь дотны танил урваснаар тэдний нуувчинд амьдрах хугацаа дуусаж, хорих лагерьт хүргэгдсэн байна. Удалгүй ээж нь нас барж, 1945 оны 2-р сард Анне, Маргот нар гэдэсний хижиг өвчнөөр ганцхан хоногийн зайтай нас баржээ. Хоргодох байранд нуугдаж байсан 8 хүнээс Аннегийн аав Отто Франк л ганцаараа амьд үлдсэн юм. Тэрээр 1947 онд охиныхоо дэвтрийг ном болгон гаргажээ. Сүүлд аав нь тэдний хоргодох байрыг олон нийтэд дэлгэж, өдгөө тэрхүү байр нь дэлхийн өнцөг булан бүрээс хүмүүс очиж үздэг музей болсон байна.
Анне Франк 15-хан насалсан ч өнөөдрийг хүртэл дурсагдсаар, хүмүүст хайрлагдсаар л байна.
