WHO is WHO: Жүжигчин Б.Одончимэг гэж хэн бэ

Театраар овоглож, тайзнаас Монголын болон дэлхийн сонгодог жүжгийн гол болон туслах дүрүүдээр үзэгчидтэй “уулзах”-ын зэрэгцээ дэлгэцийн олон төрлийн уран бүтээлд хөгжилтэй, эрхэмсэг, хээнцэр дүрүүдийг “урласан” жүжигчин Б.Одончимэгийн тухай сонирхолтой баримтуудыг хүргэе.

• Б.Одончимэг 1985 оны 7-р сарын 3-нд зургаан хүүхэдтэй айлын тав дахь охин болж Улаанбаатар хотод мэндэлсэн.
• Түүний өвөө нь Монгол Улсын Гавьяат жүжигчин У.Осор, аав нь төрийн уран дархан О.Батцэнгэл, авга ах нь Гавьяат жүжигчин, найруулагч О.Бат-Өлзий, үеэл Б.Тамир гээд түүний гэр бүлийнхэн бараг бүгд урлагийн хүмүүс.

• Тэрбээр багадаа дуу муутай, бүрэг охин байсан бөгөөд өөрийгөө хэзээ ч жүжигчин болно гэж төсөөлж байгаагүй гэдэг. Харин 10-р ангид орох жилээ гэнэтхэн л жүжигчин болохоор шийджээ.
• “Эрдмийн ундраа” цогцолбор сургуулийг төгсөөд, 2004 онд СУИС-д элсэн, Урлагийн гавьяат зүтгэлтэн С.Сугар багшийнхаа удирдлагад 2008 онд төгссөн.

• Хоёрдугаар дамжааны оюутан байхдаа хичээлийнхээ хажуугаар UBS телевизэд орчуулгын киноны дуу оруулагч хийдэг байсан нь урлагийн тогоонд хийж үзсэн нь анхны ажил нь.
• Мөн “Шинэ үе” продакшнд хоёр жил жүжигчнээр ажиллаж байжээ.

• УДЭТ-т 2009 оноос хойш тасралтгүй 13 жил ажилласан. Тайзнаа гарсан хамгийн анхны дүр нь “Алтантүлхүүр” жүжгийн Брутино.
• Театрт ажиллаж байх хугацаандаа тухайн үеийн бүхий л жүжигт гол болон туслах дүрд ажилласан. Тэдгээрээс онцолж дурдвал, “Яаж амьдрах юм” жүжгийн Кира, ”Сарны цагаан хус” жүжгийн шоронгийн бүсгүй, “Эцсийн зогсоол зөвхөн чи” жүжгийн Сильвия, “Буруугүй буруутан” жүжгийн Навчаа, “Хэлж зүрхлээгүй хайр” жүжгийн Жавхаа, Э.Оюуны “Би эндээс явахгүй” жүжгийн Сэрчмаа. 

• “Наташагийн мөрөөдөл”, “Цонхоор харсан хүн” зэрэг нэг хүний жүжигтэй. Эл уран бүтээлүүдээрээ 2014 онд “Гэгээн муза” олон улсын театрын наадмын шилдэг залуу жүжигчнээр шалгарсан.
• 2019 онд Энэтхэгийн Колката хотод зохион байгуулагдсан “International theatre” олон улсын театрын наадмын нэг хүний жүжгийн төрөлд түрүүлж байжээ.

• 2019 онд “Донна” энтертайнмент байгуулж, энтертайнментынхаа анхны бүтээл болгон “Солонго үүл” киног бүтээсэн байна. Энэ уран бүтээлдээ гол дүр бүтээсний зэрэгцээ продюсероор ажилласан.

• Тэрбээр 2020 онд Монголын эмэгтэйчүүдийн холбооны “Соёлыг түгээгч” цол, батламжаар шагнуулж байсан бөгөөд мөн 2022 онд нийслэлийн шилдэг эмэгтэйгээр шалгарч байжээ.

• Өнөөдрийг хүртэл тэрбээр “Гэрлэн дохио”, “37-р точка” олон ангит кино болон “Цасан охин”, “Намрын синдром”,  “Аз жаргалийн шок”, “Том толгойтын романс”, “Зүрхний хилэн”, “247 градус”, “Буруу өрөг”, “Нинжин сэтгэл” гэхчилэн 20 гаруй кинонд тогложээ. Түүний хамгийн сүүлд ажилласан “Гарц” олон ангит кино нь яг одоо дэлгэцээр гарч буй.