АНУ-ын 45 дахь Ерөнхийлөгч Доналд Трамп өнөөдөр 78 нас хүрч байна

Доналд Трамп АНУ-ын Нью-Йорк хотод 1946 оны энэ өдөр төржээ. Түүний өвөө Фридрих цэргийн албанаас зугтан, төрөлх Герман нутгаа орхин, АНУ-ын нутагт хөл тавьжээ. Түүний өвөө ч тэр, эцэг Фред ч тэр бизнесийн ухаантай хүмүүс байв. Доналд Трамп эцгээ дуурайсанд гайхах зүйлгүй. Фред Трамп гэр бүлийн бизнестээ хүүхдүүдээ сургахыг хичээсэн хатуухан эцэг байсан аж.

Доналдын дунд сургуулийн багш нар түүнийг “хэцүү хүүхэд” гэж томьёолдог байсан гэдэг. Хүүгийн эрч хүчийг зөв зүйлд залж чиглүүлэхээр гэрийнхэн нь цэргийн академид явуулж, Доналд ч шилдэг сурагчдын нэг байжээ. Харин Вьетнамын дайнд амь үрэгдэгсдийн тоо нэмэгдэж, тэр чинээгээрээ цэрэг татлага эрчимжихэд 1964 онд 18 нас хүрсэн Трамп, оюутан гэж 4 удаа, хөлд нь яс ургасан гэж эмчийн магадалгаагаар 1 удаа цэргийн албанаас чөлөөлөгджээ. Улмаар тэрбээр Филадельфи мужийн Пенсильванийн их сургуульд элсэн орсон байна. Трамп сургуулиараа бахархах их дуртай бөгөөд би шилдэг оюутан нь байсан гэж ярьдаг аж. 

2016 оны ерөнхийлөгчийн сонгуульд Трампыг өрсөлдөхөд олон хүн шоолон инээж байсан ч гайхалтай үйл явдал болж тэрбээр Америкийн ерөнхийлөгч болсон юм.

Тэрбумтан, бизнесмен, улс төрч Доналд Трамп бол шазруун хүсэл зоригоороо өөрийгөө бүтээж, бусдад танигдан, Нью Жерсийн эрэг дээрх жижиг хот, Америкийн хамгийн том хот хоёрын аль алинд баларшгүй ул мөрөө үлдээсэн эрхэм юм.