Хятадын төрийн тэргүүн Ши Жиньпин энэ өдөр мэндэлжээ
Ши Жиньпин 1953 оны 6-р сарын 15-нд Бээжин хотод мэндэлжээ. Түүний эцэг Ши Жоншюн нь хятадын хувьсгалч, улс төрийн идэвхтэн, Хятад улсын удирдагчдын анхны үеийн төлөөлөгч байв. Гэсэн ч 1966 онд Мао Зэдуны эхлүүлсэн “Соёлын хувьсгал”-ын хэлмэгдүүлэлтийн шуурганд Ши Жиньпиний гэр бүл өртөж, 15 настай байхад нь эцэг нь хэлмэгдүүлэлтээр 10 жил шоронд хоригдсон байна. Энэ хэлмэгдүүлэлт хүүд нь ч нөлөөлжээ. Тодруулбал, 1969 онд Ши Жиньпинийг Хятадын хамгийн ядуу мужийн нэг Шаньши мужийн Яньчуань тосгон руу хөдөлмөрийн засан хүмүүжүүлэх газар луу явуулж, цөлсөн байдаг. Тэнд бараг долоон жил амь зогоосон байдаг.
1970-аад оны эхээр намын бусад албан тушаалтнуудын хүүхдүүдийг гэртээ буцаж ирэхийг нь зөвшөөрснөөр, Ши Жиньпин ч 1974 онд нутагтаа эргэн ирэв. Мөн онд тэрбээр Хятадын Коммунист Намын албан ёсны гишүүн болж, 1975 онд Бээжингийн нэр хүндтэй Чинхуа их сургуулийн хими-технологийн факультетэд элсэн орж, 1979 онд төгсөв. Эндээс түүний улс төрийнх нь дардан замнал эхэлсэн түүхтэй.
Ши Жиньпин 2007 онд Шанхай хотын намын даргаар, удалгүй Хятадын коммунист намын байнгын хороонд сонгогдон ажиллаж, 2008 онд БНХАУ-ын дэд ерөнхийлөгч боллоо. 2012 онд Хятадын Коммунист намын Ерөнхий нарийн бичгийн дарга болсноор тэрбээр Хятадын хамгийн дээд албан тушаалтан болж, БНХАУ-ын дарга буюу тус улсын төрийн тэргүүн нь болсон юм.
