Өнөөдөр реппер Кендрик Ламарын төрсөн өдөр
Алдарт реппер, дуу зохиогч, продюсер, жүжигчин Кендрик Ламар Дакворт 1987 оны энэ өдөр АНУ-ын Калифорни мужийн Комптонд төржээ. Тийм ч элбэг хангалуун биш ч элэг бүтэн, өнөр өтгөн өссөн Кендрик 5 настайдаа ноцтой гэмт хэргийн гэрч болж байв. Түүний нүдэн дээр нэгэн залуу өөр нэгнийг буудаж хороожээ. Эл явдлаас үүдэлтэй траума хүүг өсвөр нас хүртэл нь “дагасан” байдаг.
Кендрик 12 настайгаа хип хоп хөгжим сонирхож, 2Pac, Mos Def, Eminem, Jay-Z, Snoop Dogg нарын уран бүтээлд дуртай болжээ. Энэ үеэс түүнд реппер болох хүсэл төрж, шүлэг бичиж эхэлсэн бөгөөд сургуулиа ч онц дүнтэй төгссөн байна. Түүнд их сургуульд элсэх боломж хангалттай байсан ч тэрбээр өөр замаар явахаар шийджээ. Ингээд 2003 оноос K.Dot нэрээр уран бүтээл гаргаж эхэлсэн ч төдийлөн амжилт олсонгүй. Харин түүний 2009 оноос эхэлж 2011 онд бэлэн болгосон “Section.80” цомог нь түүнд амжилт, алдар нэрийн үүдийг нээсэн юм. Энэ хүртэл тэрбээр өдрийн цагаар хар бор ажлуудыг гололгүй хийж, орой нь шөнийн цэнгээний газруудын хамгаалагч хийдэг байжээ. Анхны цомгоосоо хойш тэрбээр “Good kid M.A.A.D city”, “To pimp a butterfly”, “Damn”, “Mr.Motale and the Big Steppers” зэрэг цомог гаргасан нь бүгд амжилттай байснаар зогсохгүй энэ хугацаанд тэрбээр “Грэмми”-гийн шагнал гардуулах ёслолд 50 удаа нэр дэвшиж, 17 удаа хүртсэн байдаг. Түүнчлэн тэрбээр 2017 онд гаргасан “Damn” цомгоороо Пулитцерын шагнал хүртсэн анхны реппер болжээ.
