“Жеймс Бонд”-ын продюсерууд "Оскар"-ын хүндэт шагнал хүртэнэ
“Жеймс Бонд” цуврал киноны продюсерууд Майкл Уилсон, Барбара Брокколи нарт ирэх арваннэгдүгээр сард "Оскар"-ын хүндэт шагнал хүртээнэ гэж Америкийн кино урлагийн академи мэдэгджээ. Кино урлагт оруулсан хувь нэмрийг үнэлэн олгодог энэхүү шагналыг Кино урлагийн академиас жил бүр зохион байгуулдаг "Governors awards" ёслолын үеэр гардуулдаг. Өнөө жилийн шагнал гардуулах ёслол арваннэгдүгээр сарын 17-нд болно.
Энэхүү шагнал нь “Дэлхий дахиныг байлдан дагуулсан “Бонд” цувралын продюсеруудын амжилт болон кино урлагийн салбарт оруулсан тэдний хувь нэмрийг гэрчилнэ” гэж академийн ерөнхийлөгч Жанет Ян хэлсэн байна. Сонирхуулахад, 2021 онд дэлгэцэнд гарсан “No time to die” анги нь Английн жүжигчин Дэниел Крейгийн тагнуулч Бондын дүрийг бүтээсэн сүүлчийн анги байсан бөгөөд түүний халааг авах жүжигчнийг одоогоор зарлаагүй байгаа юм.
