Зураач Ц.Оюун-Эрдэнэ Япон Улсад үзэсгэлэнгээ дэлгэнэ

Монголын урчуудын эвлэлийн гишүүн, "Монгол арт" галерейн ерөнхий зураач Ц.Оюун-Эрдэнэ бие даасан тусгай үзэсгэлэнгээ Япон Улсад дэлгэнэ. Тодруулбал, "Монгол арт" нэртэй эл үзэсгэлэнг "Монгол арт" галерейн 5 жил, Монгол-Япон улсын соёлын хэлэлцээр байгуулсны 50 жилийн ойг тохиолдуулан зохион байгуулж буйгаараа онцлог. Үзэсгэлэнд зураачийн 20 орчим бүтээлээс гадна сүүлийн таван жилийн хугацаанд хуулбарлан зурсан "Их хүрээ” томоохон бүтээлийг дэлгэх юм. Тус үзэсгэлэн Япон Улсын Ёкохама мужийн Азамино арт галерейд энэ сарын 25-аас ирэх 7 дугаар сарын 1-нийг дуустал үзэгчдийн хүртээл болох аж.

Уран бүтээлч Ц.Оюун-Эрдэнэ нь 2008 онд Дүрслэх Урлагийн Дээд сургуулийн Монгол зургийн ангийг төгссөн бөгөөд уран бүтээлийнхээ гарааг Дүрслэх урлагийн бүтээл цуглуулагчдын нийгэмлэгт ерөнхий зураачаар ажиллаж, Монголын сүм хийдийн түүхэн судалгааны бүтээлүүд дээр ажиллаж эхэлжээ. Дөрвөн жилийн хугацаанд бүтээсэн "Эрдэнэ зуу" сэдэвт монгол зургийн бүтээлээрээ 2017 онд Монголын зураачдын эвлэлийн нэрэмжит Өндөр гэгээн Занабазарын хүндэт шагналыг хүртэж байв.

Тэрбээр XIX зууны сүүлчээр Монголд байсан 700 гаруй их бага хүрээ дацангаас үндсэн бурхны шашны томоохон цогцолбор төв Гандантэгчинлэн, Дашчойлин, Дамбадаржаалин, Манзушир, Амарбаясгалант зэрэг түүх соёлын дурсгалыг том хэмжээний цуврал болгон монгол зургийн дэлгэмэл аргаар дүрслэн бүтээх зорилготой аж. Цуврал бүтээлийг бүтээхдээ эх сурвалж баримтуудыг судалж тухайн сүм дуганы зохион байгуулалт, шашин номын баяр ёслолын үеэр үйлддэг лам нарын ёс, дэг жаягаас эхлээд хүрээ хийд тойрон суурьшсан энгийн ард иргэдийн аж байдал, буян мөргөлийн аянчид, гадны жуулчид зэрэг зон олон хөлхсөн төв суурин газрын баялаг амьдралыг дүрслэх юм. Мөн түүх соёлын гайхамшигт биет болон биет бус өвүүдийг нэгтгэн цогц болгон бүтээснээр монголын түүхийн нэгээхэн хэсгийг бүрэн дүрслэн харуулсан урлагийн бүтээл болох юм.