Киви хамтлаг 20 нас хүрч, ойн тоглолтоо хийнэ
Амтлаг киви жимсээр хамтлагаа нэрлэн, 2000-аад оны эхээр Монголын урлагийн талбарт шинэ өнгө нэмж, шуугиан тарьж байсан “Киви” хамтлаг 20 нас хүрчээ. Шаргал үст Ука, Намуун, Энхзол гэсэн гурван бүсгүй анх 2004 онд олны өмнө гарч байв. Удалгүй Энхзол хамтлагаасаа гарснаар Агий, Халиун, Соко нар хамтлагийнхаа ази төрхийг ээлжлэн төлөөлсөөр байв. “Хүслээ хэлнэ”, “Hot line”, “Хайр хайраа өөрөө олдог” зэрэг гаргасан дуу бүр нь одоог хүртэл хит байсаар л буй. Киви хамтлаг 2006 онд “Хүслээ хэлнэ” нэртэй анхны цомгоо гаргаж байсан бол 2013 он хүртэл нийт найман цомог гаргажээ. Хамтлагийн хамгийн хөөрхөн дуучин П.Алтанцэцэг хувийн амьдралдаа анхааран уран бүтээлийн замналаа түр хойшлуулсан бол энэ хугацаанд экс гишүүн Б.Халиун түүнийг орлож буй. 20 жилийн турш тасралтгүй уран бүтээлээ туурвиж яваа “Киви”-гийнхэн 2018 онд Б.Ангирмаа багшийнхаа тоглолтоор бултаараа цуглаж байв. Тэгвэл “Киви” хамтлаг ирэх 11-р сард 20 жилийн ойн тоглолтоо хийхээ зарлалаа. Тэгэхдээ “Аса” циркт хийхээр болжээ. 20 жилийн ой учир экс гишүүд нэг дор цуглаж, олны нүднээс далд байгаа Агий ч мөн тайзнаа гарах биз ээ.
