Элчин сайд А.Төмөрийн гэргий гэр бүлийн завхайрлын улмаас амь насаа алдсан гэв

Тайландын Бангкокт Элчин сайдаар ажиллаж байгаа А.Төмөрийн эхнэр Л.Орхон энэ сарын 9-нд /2025.05.09/ шилжих шөнө 17 давхар барилгаас унаж амь насаа алдсан хэрэг гарсан. Тэрээр 41 настай байсан бөгөөд энэ хэргийг осол уу, бусдын амь насанд санаатай халдсан хэрэг үү гэдгийг тогтоохоор Бангкок дахь цагдаагийн газар ажиллаж байгаа хэмээн мэдээлсэн.

Тайландын “Thai News Reports” цахим хуудас дээрх хэрэг явдлыг анх мэдээлсэн бол “Thai Examiner” цахим хуудас энэ талаар мэдээлэхдээ "цагдаагийн байгууллага уг хэргийг сэтгэл санааны хямралтай холбоотой байж болзошгүй хэмээн таамаглаж байгаа" талаар дурдсан.

Тэгвэл талийгаачийн дүү Л.Онон өөрийн фэйсбүүктээ "Хайртай дүүгээ алдсан нь зүгээр нэг харамсал биш юм, энэ бол завхайрал, ёс зүйгуй харилцааны харанхуй сүүдэрт өртөн амьдралаа алдахад хүрсэн гашуун үнэн. Хүний нутагт, хэн нэгний зугаа цэнгэл, ёс суртахууны уналтаас болж гурван хүүхдийн ээж, амьдралын төлөө тэмцэж явсан сайхан дүү минь амь насаа алдсан нь үнэхээрийн эмгэнэлтэй. Бид үнэнг нэхэх, шударга ёсыг шаардах эрхтэй. Энэ зовлонг чимээгүй өнгөрөөж болохгүй" хэмээн бичсэнээс 3 хүүхдийн ээж, цэл залуухан бүсгүй гэр бүлийн араар тавилт, завхайрлын улмаас амь насаа алдсан гэж дүгнэж болохоор байгаа юм. Талийгаачийн ар гэрийнхний гомдлыг батлах гэсэн мэт өнөөдрөөс олон нийтийн сүлжээнд дипломатч А.Төмөрийг “Хувьсал” продакшны бүтээл "Ноён эмэгтэй" УСК-нд тоглосон жүжигчин Б.Сэтгэлтүвшинтэй урт удаан хугацаанд амрагийн харилцаатай байсан талаар зарим эх сурвалжууд мэдээлж эхлэв. Гэвч хэргийн үнэн мөнийг мөрдөн байцаалт эцэслэн тогтооно.

Дашрамд дурдахад Тайландын Бангкокт суух Элчин сайд А.Төмөр нь Үндсэн хуулийн цэцийн дарга асан Ж.Амарсанаагийн хүү, МҮХАҮТ-ийн Ерөнхийлөгч Л.Төр-Одын хадам дүү бол талийгаач гэргий нь “Жигүүр Гранд” группийн Ерөнхийлөгч П.Баттөрийн залуу гэргий Л.Ононгийн төрсөн дүү хэмээн эх сурвалж мэдээллээ.

Ж.Амарсанаа нь Ардчилсан нам засаг тэргүүлж байх үед Хууль зүйн сайдаар ажиллаж байжээ.

А.Төмөр нь 2020 оны аравдугаар сарын 26-нд томилогдсон бөгөөд түүний Элчин сайдаар ажиллах хугацаа нь дууссан байжээ. Гэвч эргүүлэн татаагүй байсан нь Элчин сайдуудын томилгоонд Гадаад харилцааны яам хяналт, хариуцлага тавих ёстой үндсэн үүргээ биелүүлэхгүй байгаагийнх хэмээн олон нийт шүүмжлэлтэй хандаж байна.