ИНЧОНЫ АЖИЛТНУУД 2024 ОНД ГАР ТЭЭШНЭЭС 11 ТОНН КИМЧИ ХУРААЖЭЭ

Инчоны нисэх онгоцны буудлын ажилтнууд өнгөрсөн онд зорчигчдын ачаа тээшнээс 11 тонн кимчи хураасан гэж мэдэгджээ. Савласан кимчи нь шингэн ачаанд тооцогддог бөгөөд гар тээшинд 100 мл-ээс их хэмжээтэй шингэн тээвэрлэхийг хориглох заалтын хүрээнд 11 тонн кимчи хураагдсан аж.

Мөн  2024 онд гааль дээр зорчигдын гар тээшнээс 10.5 тонн жан буюу соус хураасан байна.

Хураасан кимчи болон жангаа орон нутгийн асрамжийн газруудад хандивласан гэж онгоцны буудлын ажилтнууд мэдэгджээ.

Нислэгийн үеэр хориглогдох өөр нэгэн анхаарал татсан хүнс гарч ирсэн нь бэлэн гоймон. 2024 онд Кореан Эйр компани энгийн ангиллаар зорчиж буй зорчигчдод бэлэн гоймонгоор үйлчлэхээс татгалзаж эхэлсэн нь халуун буцалсан ус үйлчлүүлэгчдийнх нь аюулгүй байдалд нөлөөлнө гэж үзсэнээс үүдэлтэй  аж.