#Save Говийн борууд
Өөрийн гэсэн нэр овог нь ч тодорхойгүй, өөрийн гэсэн фэйсбүүк ч үгүй, байлаа ч өөрөө хөтлөх эрх мэдэлгүй, хувцас өмсвөл хосоороо өмсөж зургаа татуулна. Эрчүүдээ үнэхээр ноорхой амьдруулж сурсан байна, манай бүсгүйчүүд. Зугаалгаар явлаа зураг нь гарахгүй, ачаа бараа зөөлөө, гал түллээ, мах эвдлээ, хорхог хийлээ.
Тэнд нэг хүн сүмбэн хуруугаар гоё ширээний ард хоол хийж бичлэг хийн наана нь нэг үл мэдэгдэх бор залуу түнтэгнэн хөлсөө гоожуулаастай. Тээр жил сүши хийдэг гоё гоё далайн хоол хийдэг олон дагагчтай бүсгүйн эвентэд очсон юм. Аанай л гоё ганган дресс кодны хувцастайгаа цэмцийж тухайн үеийн нөхөр нь хөлсөө гоожуулчихсан эвентийн хоолных нь загасыг онгоцны буудлаас үүрч дүүрэн авчирч байв. Бүсгүй хоол хийж харагдаагүй юмдаг. Зургаа авахуулж гүйгээд нэг мэдэхэд гоё ширээ зочдын өмнө бэлэн болсон байлаа.
Нүдэн дээр сэлмэн иртэй хутгаа эргэлдүүлээд гадны тогооч нар шиг хоол хийж үзүүлнэ, заана гэж төсөөлөхгүй юу. Мэдээж бид бөөндөө зургаа авахуулаад зурагтайгаа шэйрлэгдсэн. Мэдээж тэр хосууд хэсэг хугацааны дараа салсан. Даруухан ноорхой, үргэлж камерын ард хэн ч биш, юу ч биш үлддэг эрчүүдийг хэн ч дурсдаггүй нь гэм биш зан болжээ.
Дараагийн даруухан ноорхой нь тэгээд бэлэн байж байна. Эрчүүд Монголд эр хүн болж төрснөөрөө ер нь ямархан амьдрал туулж явна вэ. “Энэ яах вэ эр хүн юм чинь хоолоо олоод идчихнэ” гээд эрдэм номын мөр хөөлгөлгүй хар ажилдаа зардаг амьдрал байна гэж нэг үе ярьж байв. Цаг үеэ дагаж яваандаа арай гайгүй болох шахсан ч энд тэнд эхнэр хүүхний зарц болоод дуусаад байгаа юм биш биз? “Чиний хүүхдүүдийг гаргачихлаа. Чи л одоо тэжээ” гэдэг хүүхнүүд ч байна. Өөрсдөө бол алтан картаа барьж дэлгүүрээр шоппинг хийгээд гэртээ арьсан буйдан дээр гэрийн үйлчлэгчийнхээ хийсэн хоолыг амсаж үзээд байж ёстой хүмүүс. Тэнгэр заяат Монгол эр хүн гэдэг ойлголт алга аа, уучлаарай.
Тэнгэр заяат Монгол бүсгүй бол байна. Насны зөрүүтэй хөрөнгийн зөрүүтэй, дагагчийн зөрүүтэй гэрлэлтүүд байна. Яаж ч муу юмтай учирсан /өөрсдийнх нь бичдэг ярьдаг байдлаар/ хоёулаа байгаад авах лайкын тоо, дундаасаа үр хүүхэдтэй болоод авах лайкын тоо, гон бие гозон толгой байснаас хавь илүү. Салахад тэр нь бүр өсдөг.
Буцаад нийлэхэд өсөлтийн хязгаар харагдахгүй. Нүдэн дээр хэд хэдэн удаа ийм тоглолт хийж сошиал инфлюнсер болсон хэд хэдэн хүнийг бид мэднэ. Пост нь хандалт авахгүй ч юм уу сурталчилсан бараа нь нэг л борлогдохгүй болвол хажуудах руугаа цамнана, сошиалаар хуурай агсам тавина. Үр дүн нь зүгээр класс. Одооноос үерхэж эхлэхдээ зарлаад хамтдаа сошиалаа хандалтыг нь өсгөдөг трэнд дэлгэрч байгаа. Бүр худуудаараа хамтдаа сошиалаа хөтлөх анзааны ч болоод байна.
Угаасаа олон дагагчтай класс байснууд нь нөхөр эхнэрийг зүгээр авчихаж байна. Царайны зөв төрхтэй жүжиглэх авьяастай бол давуу тал болно. Бүх бичлэгэнд нь орно гэж анхнаасаа гэрээ хийдэг юм шиг байна билээ. Моод монголоор дуусдаггүй, монголоор эхэлж байна аа гэсэн үг. Тэр тусмаа сошиал медиагийн учрыг манайхан олчихлоо. Монгол гэрт бүжиглэж дуулж янз бүр болоод батаараа 5000 лайк багадаа. Нүцгэлбэл яаж байна? Монгол гэрт авахуулсан эротик зургууд үзэх нь үзээрэй ч юм уу бас сэдэв дотроо задарна. Бид өөрсдөө Говийн борууд. Сошиалд идэвхгүй, гэнэхэн, юманд амархан итгэдэг, хаа нэг өдрийн од шиг азтан болчихдог. Азтан гэснээс азтан боллоо гээд мөнгийг нь залилах тохиолдол гарч байсан гээд бод доо.
“Та машин хожлоо, гаалийн татвар 7 сая төгрөг төлчихвөл ачууллаа” гээд. Сошиал хуудсаар азтан болсныг нь зарлаад хүмүүс бөөн бөөнөөрөө баяр хүргэхээр итгэхгүй яах вэ дээ. Үргэлжлүүлээд “Та найраа хаана хийх вэ. Ресторанд захиалга өгөх гэсэн юм. Ирэх зочдынхоо тоог гарга”. Ингээд яриад байхаар хэн ч итгэнэ. Ажил хийх гээд амьдралд хөл тавих гэж гэрээсээ гарсан гэнэн Говийн бор охид, хөвгүүд.
Тэднийг гэр, хашааных нь хаалганы цаана юу хүлээж байгааг хэн ч мэдэхгүй. Тэдэнд дархлаа байхгүй. Нийгмийн сайн муу, хүний сайн мууг мэдэхгүй. Дэндүү гэнэн цайлган халаас хоосон сэтгэл дүүрэн Говийн борууд. Хүн шиг амьдрах гэж хичээж байгаа Говийн борууд анхнаасаа зөв замаар яваасай билээ.
Б.Ундрал
