Багшийн сарын цалин 1.5 сая бол Боловсролын сайд сард 12.3 сая төгрөгийн цалин авдаг

Хичээлийн шинэ жил эхлэх гэж байгаатай холбоотой багш нарын цалингийн асуудал хөндөгдөж эхэллээ. Мөн түүнчлэн Боловсролын яамнаас төсөв танах асуудал ч яригдаж эхлэв. Тэгвэл сайд дарга нар төсвөө эгэл жирийн иргэдийн хүүхдүүдээс бус өөрсдөөсөө эхэлж танах нь зүйтэй гэх байр суурь ч хөндөгдөж байна.

Нэг жишээ дурдья. Улсын сургуулийн нэг багшийн дундаж цалин 1.5 сая төгрөг гэдэг. Харин бодит байдал дээр шинэ залуу багш нар гар дээрээ 1.2 сая төгрөгийн цалин авдаг бол ахмад буюу олон жил ажилласан багш нар ажилласан жилээсээ хамаарч 1,5-2,3 саяыг авдаг байна. Энэхүү цалин нь амьдралд хүрэлцдэггүй учраас ажлынхаа завсар зайгаар хар ажил хийдэг тухайгаа ч багш нар ярьж байгаа юм.

Тэгвэл УИХ-ын гишүүд, Засгийн газрын сайд нарын цалинг тооцож үзье. Жишээлбэл салбарын сайд Б.Наранбаяр. Тэрээр УИХ-ын гишүүнээс гадна Засгийн газрын гишүүн, товчхондоо давхар дээлтэй гишүүдийн нэг.

УИХ-ын гишүүний сарын цалин 7.9 сая төгрөг. Тодруулбал, УИХ-ын 2020 оны 40 дүгээр тогтоолын дагуу УИХ гишүүн нь сард үндсэн цалин 6.1 сая төгрөг, онцгой нөхцөлийн нэмэгдэл 30 хувь буюу 1.8 сая төгрөг нийт 7.9 сая төгрөгийн цалинтай болсон.

Харин Засгийн газрын гишүүний цалин 4.4 сая төгрөг байдаг байна.

Ингээд тооцбол, сайд Б.Наранбаярын сарын дундаж цалин 12 сая 300 мянган төгрөг болж байгаа юм.

Зөвхөн энэ жишээнээс багш, сайд хоёрын сарын цалин хэр их зөрүүтэй байгааг харж, дүгнэж болно.

Боловсролын салбарын асуудал мундахгүй. Энэ жил НЕБ-ын сургуулиудын төсвийг бууруулж, нэг хүүхдэд ноогдох хувьсах зардал танагдах тухай яригдаж байгаа. Өөрөөр хэлбэл өмнө нь таны хүүхэд улсаас 1.1 сая төгрөгийн хувьсах зардал авдаг байсан бол одоо 900 мянгыг авдаг болно гэсэн үг.

Эцэст нь хэлэхэд дээр заларсан сайд дарга нар өөрсдийн цалин хөлснөөсөө танаж улсын төсвийг хэмнэхгүй байж улсын сургуулийн төсвийг танаад сууж байх нь өөрөө учир дутагдалтай юм.