ФОТО: “Нүүдэлчин” дэлхийн соёлын фестиваль Тайж хайрханы бэлд эхэллээ

Монголын нүүдэлчин ард түмний соёлын биет бус өвийн олон илэрхийллийг хамгаалах, өвлүүлэн уламжлуулах, өвлөн уламжлагчдыг алдаршуулах, үндэсний болон олон улсын түвшинд сурталчлан таниулах зорилготой “Нүүдэлчин” дэлхийн соёлын фестиваль өнөөдөр Налайх дүүргийн Тайж хайрханы бэлд хөшгөө нээлээ. Энэхүү соёлын арга хэмжээ нь наймдугаар сарын 21, 22, 23-ны өдрүүдэд гурван өдрийн турш үргэлжлэх бөгөөд Монгол орны өнцөг булан бүрээс ирсэн өвлөн уламжлагчид болон гадаадын зочид төлөөлөгчдийг нэг дор цуглуулж байна.

“Нүүдэлчин” дэлхийн соёлын фестивалийн түүхэн замнал нь тэртээх 1948 оноос эхтэй бөгөөд жилээс жилд цар хүрээгээ тэлж, өдгөө олон улсын хэмжээний томоохон наадам болон өргөжжээ. Наадмын түүхэн хөгжлийг дараах байдлаар багцлан харуулж байна:

Энэхүү фестиваль нь Монгол Улсад оршин буй олон угсаатны бүлгүүдийн соёлын биет бус өвийн дахин давтагдашгүй онцлогийг олон нийтэд таниулахад чиглэгддэг. Мөн байгаль, уур амьсгалын өөрчлөлттэй зохицон амьдрах нүүдэлчдийн уламжлалт мэдлэг, арга ухааныг түгээн дэлгэрүүлэх, байгаль дэлхийтэйгээ харилцан шүтэлцэж ирсэн гүн ухааныг сурталчлах чухал ач холбогдолтой юм.

Фестивалийн хүрээнд зохион байгуулагдах гол үйл ажиллагаанууд:

• Аймаг, нийслэлийн отог: Монгол орны 21 аймаг, нийслэл хотын төлөөллүүд өөрсдийн өвөрмөц соёл, уламжлалыг харуулсан отгуудыг засаж, зочдыг хүлээн авч байна.
• “Соёлын өвийн өртөө”: Соёлын биет бус өвийн долоон ай савд хамаарах өв уламжлалыг практик дээр танилцуулах тусгай өртөөнүүд ажиллаж байна.
• Эрдэм шинжилгээний хурал: “Нүүдэлчдийн ертөнц: Өнгөрсөн ба ирээдүй” сэдэвт олон улсын эрдэм шинжилгээний хурал зохион байгуулагдаж, нүүдэлчин соёлын ирээдүйн чиг хандлагыг хэлэлцэж байна.
• Үзэсгэлэн худалдаа ба хоолны гудамж: “Жуулчны хоолны гудамж”-аар зочилж үндэсний зоог зооглох боломжтойгоос гадна “Жижиг дунд үйлдвэрлэлийн” үзэсгэлэн худалдаанаас гар урлалын бүтээгдэхүүн худалдан авах боломжтой.

Мөн фестивалийн үеэр соёлын биет бус өвийн оршин тогтнох чадварыг тодорхойлох үзлэгийг үргэлжлүүлэн явуулж байна. Энэ хүрээнд фестивальд оролцож буй өвлөн уламжлагчдоас өвийн оршихуйд хамаарах мэдээллийг цуглуулж, дүн шинжилгээ хийх судалгааны чухал ажлууд давхар хийгдэж байгааг зохион байгуулагчид онцоллоо.

Нийтийн тээврийн үйлчилгээ:

Наадамчдын тав тухыг хангах үүднээс гурван өдрийн турш зохион байгуулагдах "Нүүдэлчин" фестиваль руу чиглэсэн нийтийн тээврийн тусгай чиглэлийн автобуснууд иргэдэд үнэ төлбөргүй үйлчилж байна. Иймд иргэд, жуулчид та бүхнийг Тайж хайрханы бэлийг зорьж, нүүдэлчин соёлын агуу өв сантай танилцахыг урьж байна.