Хуримын ордны дарга “сувенир” байхаас залхаж шүгэл үлээв үү?
Ах намын авгай, хүүхнүүдийг өдөр өнжүүлэх хэдэн байгууллага байдаг. Онцын ажилгүй мөртлөө онцтой тогтмол цалин, тохилог ажлын байр, эвсэг хамт олныг удирддаг дарга бүсгүйчүүд ганц бие ганхаж, сул бие сунхаж явах нь ч бий. Тэдний нэг Хуримын ордны шинэхэн дарга Ү.Оюунзул НИТХ-д Баянзүрх дүүргээс хоёронтоо сонгогдсон, өмнө нь Үндэсний цэцэрлэгт хүрээлэнг даргалж байсан улс төрийн товхийсэн намтартай бүсгүй.
Стиль имиж аятайхан, царай зүс ч өнгөлөг дориун тэрээр энэ удаад ёстой тэсэрлээ. Шинэхэн дарга маань бодвол эрхэлж буй ажил, албан тушаалаараа тойргоо услахгүй гэж намынхаа ах, эгч нарын өөдөөс занхайв. Магадгүй дараагийн сонгуульд бялуу хүртэх боломжгүй болсон юм болов уу даа. Миний дүү одоо болно гэж том ах нар нь хэлсэн бол ингээд ч болтугай бухимдлаа тайлахаас яах вэ. Ер нь энэ шинэ сэдэв ч биш. Эхэндээ бараг танай гэрийн нэг гишүүн болмоор байна гэж гүйж байгаад дараа нь дээшлэхээрээ танихаа байдаг чинь улстөрчид шүү дээ. Гэнэн алдаа хийхээргүй гэнэн биш насны бүсгүй сошиалын хандалтын төлөө намаа шармааргүй юм.
МАН дотроо хагаралтай байгаа гэдэг нь дээр дооргүй л гүйдлээ олохгүй буй бололтой.
Тэрээр “Төлөөлөгчийг яагаад “түрүүвч” болгочихсон юм бэ
Сонгуулиар мөнгө л чухал, мөнгөгүй бол ямар ч ажил хийсэн төлөөлөгч байсан дахиж гарахгүй, мөнгөө өг, чи л ганцаараа өгсөнгүй, МӨНГӨ
Ялсан, одоо “баярлалаа”-гаа хийнэ, гадаад явуулна, МӨНГӨ
Шинэ жил боллоо, хүлээн авалт хийнэ, МӨНГӨ
Цагаан сар боллоо, бэлэг тараана, МӨНГӨ
Наадам боллоо, наадам хийнэ, МӨНГӨ
Дахиад дуусахгүй МӨНГӨ, МӨНГӨ, МӨНГӨ нэхсэн дуудлагууд
Улс орныг аалзны тор шиг бүрхсэн энэ новшийн тогтолцоог бий болгосон мөнгөтэй ах, эгч нар үүнийгээ УСАЛГАА гэж нэрлэдэг. Яасан усалж дуусдаггүй улс төр вэ
Бүтэн жил тойроход, дүүрэгт, тойрогт, хороонд ийм хөрөнгө оруулалт, ийм бүтээн байгуулалт, ийм асуудлын шийдэл, ийм хамтрал, ийм дэмжлэг гэж ярьсан хүн БАРАГ БАЙХГҮЙ … Зүгээр л, мөнгө л нэхэх …
Бид “амаа ангайж” өчнөөн хөгжилтэй улс орноор явж, улс төрчидтэй уулзаж, биширч бахдаад ирдэг биз дээ, улс төрийн онол, төлөөлөгчийн үүргийг ядаж google-дээд хайгаад үз, хаана нь хэн нь, ямар эрдэмтэн судлаач, хууль дүрэм дээр нь улс төрчид, иргэдийн төлөөлөгчид МӨНГӨ Л ӨГӨХ үүрэгтэй гээд биччихсэн юм бэ МӨНГӨ Л ӨГӨӨД байдаг улс төрчидтэй орон хөгжөөд байгаа жишээ хаана байна
Энэ бол МӨНГӨТЭЙ хүний бардах улс төр, улс төрийн тогтолцоо биш, МӨНГӨГҮЙ ард түмний уруудаж буй улс төрийн тогтолцоо” гэсэн юм.
