М.Нарантуяа-Нара гишүүн 80-аад оныхныг дэмжинэ гэв

Өнөөдөр УИХ-ын дарга Д.Амарбаясгалан МАН-ын даргын сунгаанд өрсөлдөхөө албан ёсоор мэдэгдсэн явдал намрын улс төрийн галыг утгаар нь өрдөж орхилоо. Дээрх мэдэгдлийг хийх хүртэл баргийн юманд хөдөлдөггүй, хойш сууж ирсэн Д.Амарбаясгаланг МАН-ын даргын төлөө өрсөлдөхгүй байх гэсэн битүүхэн таамаг улс төрийн хүрээнд байсан юм. Гэтэл тэрээр таамгийг тэс цохисон мэдэгдэл хийсэн нь 80-аад оныхон ах нартайгаа рингэн дээр шударга үзэлцэхээр шийдсэнийг илтгэж орхисноос гадна энэ удаагийн ах намын зодоонд Д.Амарбаясгалан экс Ерөнхий сайд Л.Оюун-Эрдэнийн талд бат зогсох нь гэсэн мэссежийг өглөө.

Үүнийг батлах гэсэн мэт УИХ-ын гишүүн М.Нарантуяа-Нара сошиал хуудсандаа байр сууриа шууд илэрхийллээ. Тэрээр,

“МАН нэгэнт Монгол улсыг засагласаар бас засаглаж байгаа цагт ядаж удирдлага нь хуучны ужгирсан 70-аад оныхныгоо бөлдөгдөж хамаг хор шор найруулж, хонгил үүсгэж сурсан 60-аад оныхноос нь салгахын тулд сайн муу хамаагүй 80-аад оныхныг нь дэмжих ёстой юм!!!

Монгол улсыг худал хулгай хувхайд идүүлж авилга хээл хахуулийн төр бизнесийн сүлжээ болгосон хүмүүс бол 60-аад оныхны улс төрчид юм!!!

МАН 60-аад оныхондоо бөлдөгдүүлсээр байвал энэ улс ч сэхэхгүй нэрээ л нэг өдөр бид Непалдах ирээдүй холгүй болно!!!

Төгс хүн хаана ч байхгүй, ялангуяа МАН-д бүр ч байхгүй.

Тиймээс МАН-н гишүүд өнөө маргаашийн таван цаас таваг хоолонд явчилгүй, жижиг сажиг хэргээрээ шантаалуулчилгүйхэн шиг зоригтой зөв сонголт хийж эх орондоо бага ч атугай буян хийгээсэй билээ!” гэжээ.

М.Нарантуяа-Нара гишүүний тухайд Л.Оюун-Эрдэнийн кабинетыг огцруулах акцийн үеэр түүнийг улаан цээжээрээ хамгаалж, зүүн жигүүрээс халз үзэлцсэн ЛО-гийн фракцийн хамгийн тод дуу хоолой байсан билээ.