Ц.Хулан: Би хэнээс ч юунаас ч урваагүй ба зөвхөн төр, шашны төлөө үзэл бодол, үгээ хэлсээр ирсэн!
Монгол Улсын Ерөнхийлөгч У.Хүрэлсүх яруу найрагч Ц.Хулангийн уучлал хүссэн өргөдлийг нь хүлээн авч, Үндсэн хууль, Ерөнхийлөгчийн тухай хууль болон бусад хууль тогтоомжид заасан бүрэн эрхийнхээ хүрээнд уучлал үзүүлсэн.
Хэргийг эргэн сануулбал, Яруу найрагч Ц.Хуланг Эрүүгийн хуулийн 19.4 дүгээр зүйлийн 1-д зааснаар "Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан" гэсэн үндэслэлээр 2023 оны долоодугаар сарын 25-нд 9 жил, зургаан сар хорих ял шүүхээс оноосон юм. Улмаар Ерөнхийлөгчийн уучлалаар суллагдсан Ц.Хулан өдийг хүртэл "ам нээгээгүй" байв. Тэгвэл цахим хуудастаа уг хэрэгтэйгээ холбогдуулан байр сууриа илэрхийлжээ.
Тэрбээр "Шинэ оноос өмнө амжиж хэлэх үг
2025 он эрх чөлөөний он байв. Өршөөл уучлал бус, улс төрийн ойлголцол хүсч, хэрэг дахин дахин хянуулж, гэм буруу хүлээлгүй гарч ирсэнд минь тэчьяадан” хуланг цаазал, эх орноосоо урвагч!” гэж орилогч цусан нүдтэнүүд ээ! Мэдэж авцгаа!
Надтай холбоотой мэдүүлэг өгөхдөө “Хулан төрийн нууцтай танилцаагүй, задлаагүй, гадагш гаргах үндэслэлгүй” гэж яг үнэнээр нь хэлсэн З.Энхболд бусад зүйлд мөн л үнэнээр өчсөн А.Гансүх (ҮАБЗ-ийн ЕНБД) болон шүүхээс үүнийг нотлон тогтоосон нэр бүхий бүх хүнд баярлалаа. Гадаадаас 4.8 жил санхүүжиж, дансанд нь 2 тэрбум төгрөг байсан мэтээр худал мэдээллэснээ, бодит үнэнийг мэдмэгц залруулж чадсан ухамсарт сэтгүүлч Зариг Өнөрөөд баярлалаа. Би хэнээс ч юунаас ч урваагүй ба зөвхөн төр, шашны төлөө үзэл бодол, үгээ хэлсээр ирсэн! Бүх шатанд цагаатгал нэхсэн 3 өмгөөлөгч, тэдэн дунд Ц.Оюунбаатар өмгөөлөгчдөө баярлалаа
Миний хэрэгтэй нухацтай танилцаж, шийдвэр гаргасан У.Хүрэлсүх танд түмэнтээ баярлалаа! Та төрийн эцэг шиг байж үнэхээр чадсан! Цаашид ч ядарсан түмэндээ гараа сунгаарай, их аймаар цаг үе шүү! Төрийн тусгай байгууллагын эрх мэдлийг хэн нэг албан тушаалтан хувьдаа ашигласан, магадгүй, гадныханд иргэнээ хаяж өгсөн мэт үйлдлийг таслан зогсоосон соргог, чадварлаг тагнуулынхандаа баярлалаа. Өөрөөр яаж ч тайлбарлашгүй! Гомдол нулимс барсан ч, шүүхийнхэнд баярлалаа! Хамгийн гол зүйл: надтай болон ар гэртэй холбоотой өчүүхэн ч атугай таагүй зүйл гарвал хэн хаанаас яасан ийснийг бичээд найдвартай хадгалуулсан байгаа шүү!
Хэлж санаа амрав. Өөр дахиад юу ч эс дуугарна, хуучин онд муу бүхнээ үлдээе! Та нартайгаа сайхан оноо угтаж байгаа над шиг жаргалтай хүн өөр байна уу?!" хэмээн бичжээ.
