2025 ОНЫ ОНЦЛОХУУД: Бөх, дуучин, тоглолт, рекламны ертөнцийн одуудаар хэн, хэн тодров

2025 оныг бид бөхчүүдээрээ бахархан, урлаг соёлынхныгоо хүндэтгэн, улстөрчдөө муулж, шинэ үеийн залуусаа биширсэн баяр баясал, бахдам амжилт, түүхийн хуудас дүүрнээр өндөрлүүлж байна. Энэ жил утаа ярьсангүй, харин коксон нүүрс ярьж, уламжлалын адил бензиндээ оочерлож, хамуурсан бордюрээ хуулж авч, замаа шинэчлэн, 100, 100 жилийн ойг аймаг дамнан хэссээр дуусгалаа. Оны төгсгөлийг эрхгүй спортынхон өнгөллөө. "The Mongolz"-ынхон, 3x3 сагсан бөмбөгийн тамирчид, Physical Asia-д оролцсон жудо, бөхийн тамирчид эх орныхоо нэрийг олон улсад таниулж, утгаараа 400 сая жуулчин хүлээж авах мөрөөдөл биелэх замд хөтөллөө. Ингээд бид 2025 онд болсон урлаг соёл, спортынхны онцлохуудыг тоймлон хүргэж байна.

2025 он бөхчүүдийн амжилт, шоу ертөнцөд хүч түрэн орсон жил болов

Тийм ээ, үндэсний бөх одоо л олон улсад хүлээн зөвшөөрөгдөж бөхчүүдийг гадаад дотоодгүй хүндлэх боллоо. Б.Орхонбаярын инста 460 мянган дагагчтай болж бөхчүүдээс анх удаа IG ертөнцөд од төрлөө. Улсын арслан Б.Орхонбаяр Physical Asia-д Монголын багаа толгойлж оролцон Монгол эр хүн, бөх хүний харизм зэрэг олон сайхан чанарыг харуулж чадлаа. Онцгойлон баяр хүргэе.

Бид мөн залуухан шинэхэн арслантай болов. Б.Батмагнай рекламны ертөнцийн мангас болж, Залуус хамгийн чухал нь тэгш сайхан гэр бүлтэй хувь хүний хувьд өөгүй нь олны хайрыг татаж байна. Б.Оюунболд арслан дэвжээнээ эргэж ирэнгүүтээ мөн рекламны модель болоод байна.

Арслангуудын цаг үе нэгэнт иржээ. Дээхнэ 6 залуу зааны үед үндэсний бөх үзүүштэй, үзэгч олонтой, сонирхолтой байж. Нэр хүнд нь унаж явсан үндэсний бөхийн спортоо эдгээр залуус “аварч”, ахин сэргээж чадлаа. Баярлаад баршгүй сайхан магнай тэнийсэн жил болж байна. Улам их амжилт хүсье ээ, хүчтнүүддээ.

2025 оны топ шагнал олгогчдыг М-Си-Эс тэрбумаар тэргүүлэв

Үндэсний толгой компани М-Си-Эс Монгол Улсын арслан Э.Батмагнайд баяр хүргэн хүндэтгэл үзүүлж, бай шагналын нэг тэрбум төгрөгийг гардуулав. Мөн сагсан бөмбөгийн спортын дэлхийн дэд аварга охидыг 1 тэрбум төгрөгөөр шагнав. Товчхондоо нийгмийн хариуцлагаа тултал биелүүлсэн гэсэн үг. Хажуугаар нь тултал балбуулж баалуулж муулууллаа. Монголд л байх үзэгдэл юм.

Харин МУГТ Б.Энх-Оргилд Оюутолгой 100 сая төгрөг бэлнээр өгөв. Яг том төслийн хэмжээтэй нь харьцуулахад энэ дүн бага ч юм шиг гэж болох ч нөгөө талаар бэлгийн морины шүдийг үздэггүй монгол заншлаар бол болоо, болоо.

2025 оны шагналтнуудын хамгийн, хамгийн

Энэ онд шагналын хур буудгаараа буусан бөгөөд АЖ Н.Батцэцэг, Б.Батцэцэглэн нар хамгийн их шүүмжлүүлсэн шагналтнууд боллоо. Хөөрхөндүү байсан хүүхэн, хөөрхөн хүүхэнд шагналаа өгчихөж байгаа юм уу гэлцэн алаг нүдэн бүсгүйчүүдийг егөөдөөд амжсан. Угтаа бол шагналын заавал таяг тулсан, тэнхэл доройтсон хойноо авах албагүй л дээ.

Эсрэгээрээ жүжигчин Н.Энэрэлийг хамгийн их талархан хүлээж авсан. Гэхдээ яаж зүгээр байх вэ, өглөө нь түүнийг уйлтал бүллидсэн байна билээ. Манайхан ийм л хоёр туйлт сэтгэцтэй юм шиг “мэдрэмж өндөртэй” хүмүүс.
Оны сүүл мушгиж тодорсон од зүй ёсоор Ч.Мишээл болов. Ёстой л бор зүрхээрээ айлд гэр цэвэрлэж, хүүхэд асрагч хийж “зодуулж нүдүүлэн” байж урлагт хайртай сэтгэлээр зүтгэж ирсэн түүний он жилүүд талаар өнгөрсөнгүй. Түүнд хэн ч туслаагүй харин дарах нь олон байсан ч од болон гялалзаж чадлаа. Урлагт арын хаалга байдаггүй.
Даруухан, нэг ч рийл, лайв хийх нь бүү хэл реклам, сурталчилгаанд ч бараг тоглодоггүй жүжигичн С.Ариунбямба жамаараа яваа ертөнц гэдэг шиг МУГЖ болж чадлаа. Шагнал нүдээ олсон. Цаашилбал, “ноён солиот” Д.Бямбацогт ёстой л хун цагаан машинаар тосуулан зөгнөл биелж МУГЖ болсон. Ард түмэн Ерөнхийлөгчийг бараг загнаж байж түүнд гавьяат өгүүлсэн билээ.
Сагсчин охид гавьяатаар гангарч, Б.Энх-Оргил тамирчин маань зөвхөн тв шоу бус дараагийн амжилтаараа МУГТ цол хүртлээ. Ерөнхийлөгчийн тамгын газрыг шуурхай бус, шагнал удаадаг гэж жиг жугхийдэг ч гэнэтийн алдартнуудад харин ч нүдтэй байлаа.

2025 онд та аваагүй ч 2026 он таны ээлж байж мэднэ. Бусдын амжилтанд чин сэтгэлээсээ алга ташиж баярлаж байхад таны ээлж ч ирнэ. Та бүхэн шинэ оноо сайхан угтаарай.

Эмэгтэй дуучид: 2025 оны хамгийн, хамгийн

Оны хамгийн их захиалга авсан хамтлаг “Гала” болов. Хорин жилийн дараа ч хоёулаа үзэсгэлэн гоо, хөөрхөн дүү нар болоод байгаа “Гала” хамтлаг 2024 оны шинэ жилийн баяраар эргэн нэгдсэнээ зарлаад байв. 2025 онд харин бүх өдрүүдэд захиалгатай, бүжигчдийн хамт дуулсаар шинэ жилийн баярт гэрэл нэмэв. Оройхон гараад ширүүхэн дайрсан гэсэн үг.
Эмэгтэй хамтлаг дуучдын ертөнцөөс хайрын дууч С.Сэрчмаа анх удаа бие даасан шинэ жилийн цэнгүүнээ хот, хөдөөд зохион байгуулж, хамтлаг дуучдаа нэгтгэн базаж хэр сайн менежер болохоо харуулав.
Поп дива Б.Сарантуяа Ч.Мишээлийг хамгаас их дэмжин ранк харуулан олон улсын Silk Way Star шоунд амжилт гаргахад нөлөөлөв. Монголын урлагийн загалмайлсан эх гэдгээ батлан харуулсан гэж магтаж болно. Манай эмэгтэй хамтлаг дуучид рок попынхон нь хаа очиж хэл ам багатай гэр бүлийн асуудал нь учиргүй хаяагаа хадардаггүй хүмүүс байдаг.
“Киви” Ука ганцаараа том гутлаар гангарч тайзны стилийг эвдэв. Түүний хувьд “халтуур”-нд хамтлагаасаа илүү ганцаараа их захиалга авчээ.
Рок поп ертөнцийн хаалга оны сүүлд найруулагч Ц.Хүсэлбаатар, жүжигчин С.Өлзийхүү нарын охин Х.Баярмаа зад өшиглөн орж ирж шинэ клипээ цацав. Түүний хувьд хөтлөлт хийхээс гадна эвлэгхэн ковер дуулчихдаг.
Дуурийн дуучдаас поп стилиэр отгон Нансалмаа Э.Адъяасүрэн хагас нүцгэлэн клип хийж, олны нүдийг хужирлав. Нуруу туруу өндөр, царай зүс ч тэгш сайхан тэрээр энэ хугацаанд хясаанд нуугдсан сувд байжээ.

Дуучин бүсгүйчүүд шинэ жилд өнгө нэмдгээрээ нэмснээс гадна шинэ зүйлс ихтэй содон он боллоо.

2025 оны дуулиант шоу тоглолтын ранкыг МУГЖ Т.Ариунаа 35,000 үзэгчээр тогтоов

2025 онд шоу цэнгээн ихтэй нижгэр жил байлаа. МУГЖ Т.Ариунаагийн тоглолтын шоконд ормоор статистик гэхэд түүний тоглолтыг 35,000 хүн үзэж, 1700 хүн арын албанд ажилласан. Энэ нь ойрын 5 жилдээ эвдэгдэхэд хэцүү рекорд болж байна. “Камертон”, “Люмино” Төв цэнгэлдэхэд тоглоогүй, ВИП байдлыг илүүд үзсэн. Харин оны хамгийн үзэгчгүй цөм шатсан тоглолт “Fat Joy” байв. Маш том эрсдлийг үүрсэн залууст тусгайлан дараагийн нөр их ажилд нь амжилт хүсье.

All in Hit бут авсан. “Гала” 20 жилийн ойн тоглолтоо урдаас бэлдсэн байсан ч МУГЖ Т.Ариунаагийн тоглолттой давхцахгүй гэж цуцлан ёсзүйтэй байдлаа харуулсан нь эерэг үйл явдал болов.

Товчхондоо тасарчихсан үзэлттэй супер старын тоглолтыг хөл тавих зайгүй чихэж үздэг эрэлт, зах зээл байгааг 2025 он бидэнд харуулав. Үзэгчид урлагийнханд дүнгээ тавьсан он болж өнгөрлөө гэж дүгнэж болно.

Түүнчлэн энэ шинэ жилээр урлагийнхан чанартай хэдэн “халтуур”-тай ер нь цомхон байсныг тэмдэглэх хэрэгтэй. Дуучид чанар чансаагаа сайжруулахгүй бол үзэгчид улам smart болсоор байна.

2025 оны рекламны ертөнцийн “new face” шинэ фото моделиуд

2025 онд маш сонирхолтой хүмүүс рекламны дүр, царайгаар тодорч, жинхэнэ моделиудыг хол хаяв.

Тэргүүн эгнээнд хамгийн үзэсгэлэн төгс, ялдам афродитагаар “Наран” группийн бэр “баян” Бямбаагийн охин Дэси буюу Б.Даваасүрэн нэрлэгдэж байна. Тэрбээр өөрийн үүсгэн байгуулсан Le Beautique салоныхаа нүүр царай болон 2025 онд хамгийн тансаг, гоёмсог зураг авалтуудыг бидэнд үзүүлэв. Утаатай, уур уцаар, стресс бухимдал ихтэй Улаанбаатарт нэг ч болов ийм мэргэжлийн ажил, тийм гоё face байдаг нь сайхан юм даа.

Десигийн араас “Жигүүр гранд”-ын Д.Баттөрийн гэргий Л.Онон үзэсгэлэнт төрхөөрөө рекламны ертөнцөд дебют хийв. Алдарт эхийн одонт бүсгүй хэзээний гоё сайхнаараа алдартай ч өнөөг хүртэл олны өмнө гарч, овойж тоюойж байсан нь бараг үгүй.

Цаашилбал, ТЕГ-ын дарга асан алдарт Б.Хурц ноёнтны гэргий Ү.Сарнай өнгөрсөн жилээс Millenia цэвэр усны нүүр царай болж, рекламдах болсон. Давхар дээдсийн хатагтай нарт ширээ засах соёл заадгаараа энэ хатагтай алдаршсан. Сурталчилж буй бүтээгдэхүүн нь ч тансаг зэрэглэлийнх гэдэг утгаараа зах зээл, сегментээ нэгэнт олжээ.

“Тэнгисийн эрэг дээрх 247” шоуны оролцогч Мока үе тэнгийн охидоосоо хамгийн үнэтэй рекламанд тоглосон байж мэдэх юм. Тансаг зэрэглэлийн стейк рекламдсан нь зохисон гэж ванлий. Шинэ фото моделиуд нөгөө брэнд хатагтай Э.Туул машин рекламдахдаа машинаасаа үнэтэй цүнх барьсан гэдэг шиг л ранк тогтоож орхилоо. Дараа дараагийн шинэ моделиуд давахад нэлээн хэцүү болох нь ээ.

Бэлтгэсэн Б.Ундрал