Дарга нарын дарагддаггүй хэрэглээ дахин анхаарал татав

Төрийн өндөр албан тушаалтнуудын хэрэглээ, тансаглал хэзээнээс олны анхаарлын төвд байсаар ирсэн. Тухайлбал хэдхэн жилийн өмнө нүүрсчдийг эсэргүүцсэн жагсаалын үеэр тухайн үеийн Ерөнхий сайд Л.Оюун-Эрдэнийг хамгаалж барьсан 5.11 брэндийн шүхэр шүүмжлэл дагуулж, “төрийн албан хаагчдын хэрэглээ үнэтэй байна” хэмээн шуугиулж байв.

 

Үүнтэй адилхан жишээ сүүлийн үед бишгүй сэвэгдсээр буй. Өдөр тутамдаа л дэлхийн хамгийн үнэтэй цүнх болох Hermes Birkin барьж, тансаг хэрэглээний брэндийг баруун солгойгүй эдэлж, гангардаг нь төрийн түшээд нарыг орлогоосоо давсан хэрэглээтэй хэмээн шүүмжилсээр л байна. 

Тэгвэл хоёрхон хоногийн өмнө /2026.01.22/ Монгол Улс АНУ-ын Энхийн зөвлөлд нэгдэхтэй холбоотой арга хэмжээний үеэр Ерөнхий сайд Г.Занданшатарын зүүсэн шил олны анхаарлыг татав. Тодруулбал, түүний зүүсэн Ray-Ban брэндийн нарны шил нь 459 долларын үнэтэй буюу монгол мөнгөөр ойролцоогоор 1,615,000 төгрөгийн үнэтэй аж. Тус шил нь хиймэл оюун ухаанд суурилсан орчуулга хийдэг, камер, чанга яригч зэрэг дэвшилтэт технологид суурилсан бүтээгдэхүүн юм.

 

Үүнтэй холбоотойгоор цахим орчинд тухайн шилийг олж авах гэсэн хүмүүсийн эрэлт нэмэгдэх болжээ. 

Төрийн түшээдүүд жилийн орлогоо давсан тансаг хэрэглээтэй ч төдийлөн ил цагаан брэндээ гайхуулах нь багассан бол жижиг деталь эд хэрэглэлд хошуурах болсны ойрын жишээ энэ юм. Бугуйн цаг, энгэрийн зүүлт, нүдний шил, шүхэр, малгай гэх мэт брэндийн тансаг хэрэглээ нь улам бүр жижиг хэрэглээ рүү нэвтрээд эхэлжээ.   

Бэлтгэсэн Б.Ариунзаяа