Бруклин Бекхэмийн гэр бүлийн замнал: Дэлхийн хамгийн шилдэг гэр бүлээс хагарсан харилцаатай гэр бүл болон хувирлаа

Дэлхийн шоубиз ертөнцийн хамгийн алдартай хос, шилдэг гэр бүл ч гэгддэг Английн хөлбөмбөгчин гүн Дэвид Бэкхэмийн гэр бүлийн тулга тойрсон хэрүүл, шуугиан дэлхий даяар дуулианы нэг гол сэдэв болоод байна.

Дэвид Бекхэм Английн “Манчестер Юнайтед”-ын тоглогч байхдаа тоглолт үзэхээр ирсэн “Spice Girls” хамтлагийн Викториа Адамстай танилцснаар тэд зууны шилдэг хос гэх тодотголын эзэд болсон юм. Алдарт хөлбөмбөгийн тамирчин, загварын магнат хатагтай хоёр 1999 онд бүл нэмж, хүүтэй болж байв.

Бруклин Бекхэм төрснөөсөө хойш олны анхаарлын төвд өссөн нэгэн. Харин түүний саяхан Instagram-д нийтэлсэн пост энэ анхаарлыг урьд хожид байгаагүйгээр улам тодрууллаа. Олон нийт Бруклины уран бүтээлийн амжилтыг алдартай эцэг эхтэй нь холбон тайлбарлаж, “nepo-baby” хэмээн нэрлэж буй. Бруклин Бекхэм өөрийн алдартай эцэг эх болох хөлбөмбөгийн домог Дэвид Бекхэм, “Spice Girls” хамтлагийн гишүүн асан өдгөө загвар зохион бүтээгч болсон Виктория Бекхэм нартайгаа харилцаагаа тасалснаа инстаграм сторигоор баталснаар хэвлэл мэдээллийн гол сэдэв болоод байгаа юм. Тэдний хоорондын зөрчлийн тухай цуурхал Бруклин Никола Пелтзтэй 2022 оны дөрөвдүгээр сард хуримаа хийснээс хойш эрчимжиж эхэлжээ.

Тэгвэл Бруклин Бекхэмийн олны өмнө ил байдаг амьдралын замналыг он цагийн хэлхээгээр эргэн сануулъя.

2000 он

Бруклин нэг настайдаа: Аав Дэвид Бекхэм нь Манчестер Юнайтедын бүрэлдэхүүнд тоглож байхдаа 2000 оны тавдугаар сард Тоттенхэм Хотспурын эсрэг FA Carling Premiership-ийн тоглолтод ялалт байгуулсныг хамт тэмдэглэж байжээ. Мөн Дэвид Лос Анжелес Гэлакси багт тоглож, 2012 оны MLS Cup-ийг хүртэхэд бүх хөвгүүд нь аавынхаа ялалтыг хамт тэмдэглэн талбайд гарсан байдаг.

2001 он

Бруклиний ихэнх хугацаа хөлбөмбөгийн талбайд өнгөрч, аавынхаа ялалт бүрийг хамт тэмдэглэн өнгөрүүлдэг байв.

2004 он

Залуухан Бруклин 5 настайдаа анх удаа улаан хивсэн дээр алхсан нь "Scooby-Doo 2: Monsters Unleashed" киноны нээлт байжээ.

2007 он

Бруклин болон түүний дүү Круз, Ромео нар: 2007 оны зургаадугаар сард Дэвид Бекхэм Реал Мадридын бүрэлдэхүүнд тоглож байхдаа Пример лигийн аварга болсныг талбай дээр хамт тэмдэглэж, аавтайгаа ижил өмсгөлтэйгөөр гэрэл зураг авхуулжээ.

2012 он

Дэвидийн гурван хүү болон охин Харпер бүгд хөлбөмбөг тоглож үзсэн ч Бруклин, Круз нар мэргэжлийн түвшинд үргэлжлүүлэхээс татгалзаж байсан бол өдгөө дүү Круз нь энэ замналыг сонгожээ.

2013 он

Бруклин ойролцоогоор 13 настайгаасаа гэрэл зураг сонирхож эхэлжээ. Тэрбээр 2024 оны зургаадугаар сард InStyle сэтгүүлд өгсөн ярилцлагадаа хөлбөмбөг, гэрэл зураг, модель хийх нь түүний хамгийн гол гурван хобби хэмээн хэлж байжээ.

2014 он

Бруклин 2014 онд модель хийх карьераа эхлүүлж, 15 настайдаа өсвөр үеийнхний хэв маягийг онцолсон Man About Town сэтгүүлийн нүүрийг чимсэн байна.

2015 он

Бруклин 2015 оны арваннэгдүгээр сард аавынхаа хамт UNICEF-ийн зохион байгуулсан, тусламж хэрэгтэй хүүхдүүдэд зориулсан хандивын хөлбөмбөгийн тоглолтод оролцож, санхүүгийн дэмжлэг цуглуулахад нэгджээ.

2016 он

Түүний анхны үерхэлийн эзэн жүжигчин Хлои Грейс Морец байсан бол тэд албан ёсоор олны өмнө гарсан нь Teen Choice Awards арга хэмжээ байв. Тэднийг 2013 оноос хойш үерхэж байсан гэж ярьдаг.

2017 он

Бруклин 2017 онд гэрэл зургийн карьераа дараагийн шатанд гаргаж, Нью-Йорк хот руу нүүн Parsons School of Design-д гэрэл зургийн мэргэжлээр суралцаж эхэлжээ. Тэр жилдээ “What I See” нэртэй гэрэл зургийн ном гаргаж, Лондонд өөрийн бүтээлийн үзэсгэлэнг дэлгэж байв.

2018 он

2018 он гэхэд Бруклин Parsons-оос сургуулиа орхиж, Их Британи руу буцан, нэр хүндтэй британи гэрэл зурагчинд дадлагажигчаар ажиллаж эхэлсэн байна.

2019 он

2019 оны сүүлээр Бруклин одоогийн эхнэр болох тэрбумтан, хөрөнгө оруулагч Нелсон Пелтз, загвар өмсөгч Клаудиа Хеффнер нарын охин Никола Пелтзтэй танилцаж байв.

2022 он

Улмаар 2022 онд Бруклин, Никола нар зууны шилдэгт тооцогдох хуримаа хийж, нийтдээ 26 сая орчим австрали доллар зарцуулсан тансаг хуримын эзэд болсон юм.

2023 он

Хожим Бруклин, Никола нар Бекхэмийн гэр бүлийн хамтаар Дэвид Бекхэмийн амьдрал, карьерын замналыг өгүүлсэн Netflix-ийн “Beckham” баримтат киноны нээлтэд оролцсон юм. Тэгвэл энэ үеэр уг гэр бүлийн хамт авхуулсан бичлэг дахин олны хүртээл болж, биеийн хэлэмж судлаач Fox News Digital-д өгсөн тайлбартаа гэр бүлийн дунд “хүйтэн, түгшүүртэй уур амьсгал” мэдрэгдэж байсан хэмээн дүгнэсэн байдаг.

2024 он

Гэсэн ч Бекхэмийн гэр бүлийнхэн, Николагийн “Lola” киноны нээлтэд оролцож, анхны гол дүр, мөн найруулагчийн дебют бүтээлийг нь дэмжиж байсан билээ.

2025 он

Хуримаасаа гурван жилийн дараа Бруклин, Никола нар тангарагаа дахин сэргээжээ.

2026 он

Харин 2026 онд Бруклин эцэг эхтэйгээ зөрчилдөж буй талаарх цуурхлыг анх удаа ил тод хүлээн зөвшөөрч тэр бүү хэл харилцаагаа тасалсан бөгөөд ойрын хугацаанд эвлэрэх бодолгүй байгаагаа мэдэгдсэн юм.

Тэрээр “Миний амьдралын туршид эцэг эх минь манай гэр бүлийн талаар хэвлэл мэдээлэлд гарч буй түүхүүдийг хянаж, хиймэл сошиал постууд, дүр эсгэсэн гэр бүлийн арга хэмжээ, үнэнч бус харилцаагаар олон нийтийн өмнөх дүр төрхийг бүтээсээр ирсэн” хэмээн инстаграм сторидоо бичжээ.

“Сүүлийн үед тэд өөрсдийнхөө нүүр царайг хамгаалахын тулд, ихэнхдээ гэм зэмгүй хүмүүсийн золиосоор, хэвлэлд худал мэдээлэл тараахын тулд ямар их зүйл хийдгийг өөрийн нүдээр харлаа”.

Тэрбээр энэ асуудлыг хувийн хүрээнд үлдээхийг хүссэн ч эцэг эх нь олон жилийн турш хэвлэлд зориудаар мэдээлэл “шидэж” ирсэн тул дуугарахаас өөр аргагүй болсон гэж тайлбарласан юм.

Мөн “Виктория Бекхэм Николагийн хуримын даашинзыг оёж амжихгүй гэдгээ хамгийн сүүлд мэдэгдсэн тул өөр даашинз хайхаас өөр аргагүйд хүрсэн түүнчлэн хуримын үеэр өөртэй нь зохисгүй байдлаар бүжиглэсэн” гэх мэтээр буруутгаж буйгаа хүү Бруклин тайлбарлаж буй.

Ийн Их Британи төдийгүй дэлхийн хамгийн шилдэг гэр бүл гэгдэж ирсэн Дэвид Бекхэм, Виктория Бекхэм нарын гэр бүлд “бөмбөг” дэлбэрч бараг зууны хагарал гэгдэхээр хэмжээний дуулиан болоод байна. Гэвч цусан төрөл бол цусан төрөл. Нэг л өдөр тэд эвлэрч, эв зүйгээ олохыг үгүйсгэх аргагүй. Бүхнийг цаг хугацаа харуулна.

Нөгөө талаар сошиалд хэт гоё ганган, төгс төгөлдөрийг бүтээгсэд бодит амьдрал дээрээ үүнийхээ яг эсрэг байдаг гэдгийн нэг нотолгоо болж буйгаараа эл дуулиан ач холбогдолтой юм.