АЖ Э.Амартүвшингийн гала тоглолтын үеэр Дуурийн театрынхан хэрэлдэж олныг гайхшруулжээ

Дуурийн театрын тайзнаас дэлхийн дэвжээнд зодоглож, сонгодог урлагийн ертөнцөд хэдийнэ хүлээн зөвшөөрөгдсөн нэрт баритон Э.Амартүвшин эх нутагтаа 20 хоног амрах чөлөөнөөрөө ДБЭТ-ынхны хүсэлтээр эх орондоо хоёр өдөр тоглолт хийв. Эхний өдөр алдарт “Макбет” дуурь, хоёр дахь өдрөө гала тоглолт хийсэн нь сонгодог урлагаар ангаж цангасан их хотын баячууд, элитүүдийг ягаан театрт чуулуулж амжив.

Тасалбарынх нь үнэ 300 мянган төгрөг хэдий гуравхан өдрийн дотор зарагдаад дууссан мэдээ чихэнд чимэгтэй. Харамсалтай нь хоёр дахь өдрийн гала тоглолтын үеэр Дуурийн театрын ажилчид тайзны ард хэрэлдсэн нь заалаар нэг сонсогдож, үзэгчдийг алмайруулсан байна. Театр гэдэг юусан билээ. Аль ч нийгмийн элитүүд, үгүй ядахдаа л өөрсдийгөө элит гэж боддог баян хүмүүс цугладаг, оюун санаа хийгээд соёлын, урлагийн дээд зиндаа ноёлох учиртай ариун, гэгээн орон зай. Тийм орон зайд дэлхийн дээд түвшинд дуулж, байлдан дагуулж яваа Ардын жүжигчнээ гуйж дуулуулчихаад арын тайзан дээр нь хэрэлдэнэ, хэрүүл нь заалаар нэг тархана гэдэг юу вэ? Бидний соёл, сэтгэлгээний түвшин хаана явна вэ?

Аливаа байгууллагын дотоод соёл удирдлагаасаа шууд хамаардаг зүй тогтолтой. Ялангуяа ДБЭТ үеийн үед даргынхаа соёл, боловсролын түвшин, хүрээллээр тодорхойлогдож ирсэн өвөрмөц газар. Энэ логикоор бол Дуурийн даргаар саяхан томилогдсон Б.Сарантуяа руу шүүмжлэлийн бай чиглэнэ.

Түүний тухайд УИХ-ын гишүүн Б.Жаргалмаагийн бэр, Уран зургийн галерейн захирлаар давхар ажиллаж байсан, өмнө нь Хотын Захирагчийн Ажлын Албанд самбар хариуцсан мэргэжилтэн хийж байсан хэмээн хэл ам ихтэйхэн театрын даргаар томлогдсон. Бараг анхны томоохон төсөл нь Э.Амартүвштингийн энэхүү хоёр тоглолт байсан болов уу.

Ядаж байхад яр гэгчээр Дуурийн театрын нойл нь шал өмхий байсан, соёлын байгууллага тэгэх тусмаа сонгодог урлагийн цор ганц театр гэхэд туйлын бохир заваан байсан гэх шүүмж, “шуум”-ыг ягаан театрын эрхэмсэг үзэгчдээс ирж байх. Дэлхийд данстай баритоны фенүүд, халааснаасаа 300 мянган төгрөг төлчихөөд ийм мэдрэмж авна гэдэг хэцүү еэ. Дэлхийн хэмжээний дуучинтай театр шиг хөгжихсөн дөө.