Ө.Содгэрэл дэлхийн загварын салбарын хамгийн нэр хүндтэй “BoF 500 Class of 2025”-д багтсан анхны Монгол хүн боллоо
Монголын загварын салбар уналтын байдалтай “Гоёл”, “Торго” шоу нь дампуурлын ирмэг дээр үзэгчгүй шахуу, салбарынхан нь нэр хүнд, ёсзүй нь сулхан хэцүүхэн байгаа. Тэгвэл хаа очиж гадаадад гарсан моделиуд, гадагшаа чиглэсэн ажлууд ер нь амжилттай, хувийн тоглолт нь энд тэнд эх орныхоо тугийг мандуулах хэмжээнд очсон. “The Business of Fashion”-ээс жил бүр гаргадаг “The BoF 500” жагсаалт нь дэлхийн загварын салбарт нөлөө үзүүлж буй шилдэг удирдагчид, бүтээлчид, бизнес эрхлэгчдийг онцолдог билээ. Монголоос, BURO. Mongolia болон Velin сэтгүүлийн үүсгэн байгуулагч, ерөнхий захирал, эрхлэгч Өлзийхутагийн Содгэрэл нь “BoF 500 Class of 2025”-д багтсанаар дэлхийн загварын салбарын хамгийн нэр хүндтэй жагсаалтад багтсан анхны Монгол хүн болж байна.
Загварын салбараар овоглож явсан Ө.Содгэрэл фото моделийн карьер зурвасхан хөөсөн ч алдар хүнд нь топуудтай зэрэгцэхүйц энэ салбарыг өнгөлж яваа бүсгүй. “Тэнгисийн эрэг дээрх 24/7” шоунд панелист хийхдээ бага зэрэг амны алдаа хийн олон нийтэд зэмлүүлээд авсан ч сайхан бүсгүй заавал арван хуруу тэгш байх албагүй гэлцэн манайхан хайрласан хэвээр байгаа.
Мөн Ө.Содгэрэл загварын салбарынхнаас амжилттай гэрлэлт хийсэн тогтсон амьдралтай хуруу дарам цөөн бүсгүйчүүдийн нэг учраас хайрлаж хүндлэгддэг. Өв тэгш сайхан бүсгүйд баяр хүргэж амжилт хүсье.
