ТӨК-уудыг ил тод, хариуцлагатай, ашигтай ажиллах шинэ стандарт руу шилжүүлнэ
“Эрдэнэт үйлдвэр” ТӨҮГ, “Дарханы төмөрлөгийн үйлдвэр” ХХК, “Багануур” ХК, “Цемент шохой” ХХК, “Шивээ-Овоо” ХК-ийн удирдлагуудтай нэгдсэн уулзалт зохион байгууллаа.
Уулзалтаар Засгийн газраас өгсөн бодлого, үүрэг чиглэлийг танилцуулж, охин компаниудын үйл ажиллагааг нэг стандарт, нэг гүйцэтгэлд оруулах чиглэлээр дараах асуудлуудыг хэлэлцэв. Үүнд:
- үйл ажиллагааны өнөөгийн нөхцөл байдал
- санхүү, үйлдвэрлэл, борлуулалтын үзүүлэлт
- гүйцэтгэлийн гол KPI ба үр дүн
- тулгамдсан асуудал, бодит шийдлүүд
- дунд, урт хугацааны хөгжлийн бодлого
Мөн компанийн төлөөллүүд өнгөрсөн хугацаанд хэрэгжүүлсэн онцлох ажлуудаа танилцуулж, үр ашгийг нэмэгдүүлэх, бүтээмжийг өсгөх, төслүүдийг эдийн засгийн эргэлтэд оруулах чиглэлээр хэрэгжүүлэх тодорхой арга хэмжээнүүдийг харилцан тохиролцов.
“Эрдэнэс Монгол” нэгдэл цаашид төрийн өмчит компаниудыг ил тод, хариуцлагатай, ашигтай ажиллах шинэ стандарт руу үе шаттай шилжүүлж, бодит үр дүн гаргахад төвлөрөн ажиллах болно.
