УРЬДЧИЛСАН ПРОГНОЗ: Н.Учралын кабинетад ХЭН, ХЭН сайдаар багтах вэ?

Монгол Улсын 35 дахь Ерөнхий сайдаар Н.Учрал томилогдож тамгаа гардаж авлаа. Одоо түүнд Засгийн газраа эмхэлж, кабинетаа бүрдүүлэх том ажил үлдэж байна. Чуулганы хуралдаанд хэлэхдээ "Сайд бол суралцдаг ажил биш. Цог золбоотой, хурдтай, ачаалал даах чадвартай хүмүүсийг хүйс харгалзахгүй сайдаар уримаар байна" хэмээн хэлсэн түүний үг Засгийн газартаа залуу гишүүдийг түлхүү багтаана гэсэн утга ч байж мэдэх.

Юутай ч шинэ Ерөнхий сайд танхимаа хэрхэн бүрдүүлэх талаарх урьдчилсан прогнозыг тоймольё.

Тэргүүн Шадар сайд – Н.Номтойбаяр

Одоогийн Ж.Энхбаяр сайдын хариуцаж буй албан тушаал. Засаг дотроо ранкаараа дээгүүрт орно. Ерөнхий сайдаа орлох хэмжээний Шадар сайдын суудлыг засагт хамтрах Үндэсний эвслийн тэргүүн Н.Номтойбаярт өгөх нь бараг тодорхой болсон. Өмнө нь Н.Номтойбаяр хэд хэдэн удаа Г.Занданшатар л биш бол өөр Засагтай хамтрахад бэлэн гэж байсан удаатай.

Сангийн сайд-Г.Тэмүүлэн

Засгийн, улсын гол жасыг атгаж суугаа яам энэ удаад цус сэлбэх нь тодорхой болсон. Сангийн сайд Б.Жавхлангийн оронд Г.Тэмүүлэнг томилох магадлал өндөр байна. Г.Тэмүүлэнгийн тухайд засаг солигдох бүрт Сангийн сайдаас авахуулаад Ерөнхий сайдал хүртэл нэрээ дэвшүүлж, амбицтай өрсөлдөж ирсэн. Энэ удаад томилгоо авах нь бараг тодорхой болов уу.

Гадаад харилцааны сайд – Б.Батцэцэг

Ерөнхийлөгч У.Хүрэлсүхийн “тамгатай” Б.Батцэцэг сайд Гадаад харилцааны сайдаар бараг л үлдэх байх гэсэн яриа саарал ордонд жиг жугхийж буй. Ер нь ч ажлын хувьд муу байсан түүх түүнд байхгүй. Харин ч гадаад харилцаа талдаа тун боломжийн ажиллаж буй. Гагцхүү олон удаа сайдаар улирч үлдлээ гэдэг л түүнд сөрөг оноо авч ирж магадгүй.

Гэр бүл, хөдөлмөр, нийгмийн хамгааллын сайд – Г.Үүрийнтуяа

Гэр бүл, хөдөлмөр, нийгмийн хамгааллын сайдаар Т.Аубакир ажиллаж байгаа билээ. Тэгвэл түүнийг Г.Үүрийнтуяагаар солино гэсэн “шум” бий. УИХ-ын гишүүн Г.Үүрийнтуяагийн хувьд Нийгмийн Ардчилал Монголын эмэгтэйчүүдийн холбооны Ерөнхийлөгчөөр томилогдоод удаагүй байгаа бөгөөд чухал местэнд буй ганц эмэгтэйгээ “шалдан” байлгаж болохгүй гэж ах намынхан үзжээ.

Зам, тээврийн сайд –Ж.Ганбаатар, Б.Дэлгэрсайхан

Улс төрийн хүрээнд Ж.Ганбаатарыг Зам, тээврийн сайдаар томилогдох магадлалтайг онцолж байна. Гурав дахь удаагаа сонгогдсон түүнд УИХ-ын даргын дэмжлэг хэр хэмжээнд байхаас шалтгаалж сайдаар ажиллах уу, үгүй юу гэдэг нь шийдэгдэнэ. Харин одоогийн сайд Б.Дэлгэрсайхан үлдэх талаар ярьж байгаа гэсэн мэдээллийг ч эх сурвалжууд өгч байгаа юм. Хэрвээ Б.Дэлгэрсайхан үлдэнэ гэж зүтгэвэл Ерөнхийлөгч гол асуудлыг нь шийдвэрлэнэ.

Боловсролын сайд-Л.Энх-амгалан, Эрчим хүчний сайд-Н.Найдалаа

Г.Занданшатарын Засгийн газарт Эрчим хүчний сайд Б.Чойжилсүрэн, Боловсролын сайд П.Наранбаяр нар өөрсдийн хүсэлтээр чөлөөлөгдөх өргөдлөө өгсөн. Тэдний оронд Боловсролын сайдаар Л.Энх-Амгалан, Эрчим хүчний сайдаар Н.Найдалаа нарын томилогоо хэвээр үлдэх аж.

Хууль зүйн сайд-Л.Мөнхбаатар

Н.Учралын засгийн газарт үлдэх нүүргүй нэг хүн бол Хууль зүйн сайд Б.Энхбаяр. Л.Оюун-Эрдэнийн Засгийн газарт сэлэмний чинь ир болно хэмээн бадарч явсан тэрбээр Г.Занданшатарын Засгийн газарт багтаж авлигалын хэрэгт холбогдоод байгаа. Ноцтой мэдэгдлүүдийг хийдэг хэдий ч баримт нотолгоо гаргаж ирж, бодит хэрэг шийдвэрлэгдэж байсан удаа бараг үгүй. Тиймээс гурван засаг дамжиж Н.Учралыг налах нь түүнд бүр ичгүүртэй хэрэг болох тул түүнийг Хууль зүйн сайдаас чөлөөлөлж Л.Мөнхбаатарыг томилох сураг байна.

Цахим хөгжил, инновац, харилцаа холбооны сайд – Э.Батшугар

Г.Занданшатарын Засгийн газрын нэр хүнд өндөртэй сайдуудын нэг бол Э.Батшугар. Тиймээс түүнийг сайдын суудлаас нь хөдөлгөхгүй байх. Тэрбээр өмнө нь Инновац, цахим бодлогын байнгын хорооны даргаар ажиллаж байсан. Дээр нь нэмээд МАН-ын одоо байгаа гишүүд дундаас цахим бодлого, инновац гэдэг зүйлээ арай нэгг ойлгодог хоёр гишүүний нэг нь Э.Батшугар юм.

Эрүүл мэндийн сайд – Т.Мөнхсайхан / Ж.Чинбүрэн

Эрүүл мэндийн сайдаар Т.Мөнхсайхан дахин томилогдох магадлал өндөр байна. Ерөнхийлөгчийн хүн гэгддэг түүнийг мөргөж унагах ганц хүн нь Ж.Чинбүрэн. Энэ томилгоонд УИХ дарга хэрхэн хандахаас бүх зүйл шалтгаалж шийдэгдэнэ.

М.Үүрийнтуяа