О.Хангай VS М.Бадарч
Улсынхаа наадамд бардам түрүүлсэн ч эцэстээ допинг хэрэглэсэн нь илрэх бөхчүүдийн хувьд хамгийн гутамшигтай зүйл. Үндэсний бахархал болж, ард түмэндээ хүндлэгдэж явснаа нэг л өдөр допинг хэрэглэсэн болох нь тогтоогдож, сүүлдээ мэлзэж, улаан цагаандаа гарсан жудаггүй, хэнэггүй олон бөхчүүд бий. Тэдгээрийн араас М.Бадарч гишгэв. Тэрээр допинг хэрэглэсэн ч арбитын шүүхэд хандаж, улмаар ялагдсан. Өдгөө Улсын аварга О.Хангайтай цахим орчинд мэтгэлцэж сууна.
О.Хангай бөхчүүдийг үнэнч шударга байх, допингоос зайлсхийхийг цахим сүлжээнд уриалж эхэлсэн. Гэвч үүнийг М.Бадарч өлгөн авч О.Хангайг ДНК-ийн шинжилгээ өгье. Ард түмний баатар болох гэж попроод яах вэ" хэмээн бичсэн. Хариуд нь Улсын аварга О.Хангай долоон удаагийн допингийн шинжилгээ өгснийгөө хариутай нь хамт олон нийтэд дэлгэв. М.Бадарч харин юм хэлсэнгүй.
Допингийн эсрэг үндэсний төвд О.Хангайн нээлттэй дэлгэсний адил М.Бадарчийн шинжилгээний бичиг ч хадгалагдаж буй. Үүнд S1 төрлийн допинг хэрэглэсэн нь ил тод бичээтэй буй. Харин М.Бадарч арбитрт маргахдаа:
- Шээс сольсон
- Сорьц авсан ажилтнууд мэргэжлийн сургалтад суугаагүй байсан гэх мэт үндэслэл гаргаж тавьсан ч "Шинжилгээний хариу буруу" хэмээн мэдэгдээгүй юм.
Шээс солиогүй нь камерын бичлэгээр баталгааждаг. Мөн ТЕГ, ЦЕГ, АТГ-ын хамтарсан баг шинжилгээг авсан. Тэдний дунд допингийн шинжилгээ авахад чиглэсэн сургалтад хамрагдаагүй хүмүүс байсан гэгддэг ч энэ нь М.Бадарчийг өмгөөлөх шалтгаан болохгүй юм. Сүүлдээ М.Бадарчийн өмгөөлөгч арбитрын хуралдааны үеэр "Гараа угаагаагүй, бээлий өмсөөгүй" гэж дуугарсан. Нэг үгээр М.Бадарч үнэнд гүйцэгдэж буй.
Гэвч М.Бадарч өнөөг хүртэл маргасаар байна.
