Монголын хамгийн тансаг хийд Шадар сайд С.Амарсайханых

Бод доо, VIP өрөөнд ууж идэхдээ Ногоон дарь эхийг хараад сууж байна гээд. Тийм газар байна, цаад Налайхад чинь. Хийлч Ч.Дэлгэрцэцэг Соёлын гавьяатынхаа найраа тансаг гэгч нь хийснээр олны анхааралд өртсөн тус хийдийн нэр Сайн Номун. Хамба лам нь Шадар сайд С.Амарсайханы төрсөн ах хамба лам, доктор С.Нэргүй. Ахан дүүс хийдийг аавынхаа дурсгалыг хүндэтгэн Сайнбуян буюу Сайн Номун гэж нэрийдсэн гэдэг.

Хийд анх 1990 онд байгуулагдсан, 2006 оноос хийдийн өргөтгөл, бүтээн байгуулалтын ажил эхэлж энэ ажилд УИХ-ын гишүүн, Онцгой байдлын сайд асан С.Отгонбаяр буюу “Оюуны ундраа” групп 4,5 тэрбум төгрөгийн хөрөнгө оруулалт хийж 9 суварга бүхий сүм, шашны сургуулийн цогцолбор 2011 онд ашиглалтанд оржээ. Хийдийн гоё сайхантай бол ярих юм байхгүй. Шил толь шиг гялалзсан битүү алтан бурхдаар дүүрэн айхавтар тансаг хийдэд эргэл мөргөл үйлдэнгээ ресторанд нь тухалж саатан амт чанартай хоол зооглоно. Хүсвэл хийлч Дэги шиг найр наадам ч дэглэчихнэ. Сайнбуян гуайн үр хүүхдүүд сүсэг ихтэйн дээр сүйхээтэй юм гээч.