МАК-ийн хунтайж Н.Номтойбаярыг Тэргүүн Шадар сайд болгохын тулд АН-ыг тийрч, Засгийг унагах сценари бичигдсэн үү?
Ардын нам, ардын засаг мандтугай гэж цэрэг ёсолгоо хийгээд байдаг ах Ерөнхийлөгч болоод дөрвөн жил болж байна. Тэрбээр Ерөнхий сайдыг дуудаж уулзаад хоёр үг хэлээд л хамтарсан Засгийн газрыг нь хажуулдуулчихлаа. Монголд угаасаа том ахын байнга хэлээд байдаг Ардын засаг, ард түмний Засгийн газар хэзээ ч байсангүй. Байх ч үгүй нь тодорхой харагдаж буй.
Ерөнхий сайд нар нь ч эрх дархтай юм шиг боловч эзэн мэдэлгүй л хүмүүс. Тэднийг УИХ биш улс төр, бизнесийн бүлэглэлүүд л томилж, чөлөөлдөг систем рүү нэгэнт шилжсэнийг сүүлийн өдрүүдэд өрнөж буй улс төр харуулж байна.
Залуус Л.Оюун-Эрдэнийг орлогоо нотло, чадахгүй бол огцор гэж шаардангуут шал өөр шалтаг гаргаж ирээд танхимаар нь татаж унагаж байгаа нь “эзэд” хоорондоо үг хэлээ нэгтгэн эвссэн бөгөөд эрх ашиг нь ноцтой хөндөгдсөнийх гэж уншиж болохоор.
Эзэд гэж хэн бэ гэдэг ч тодорхой. Улстөрчдийн хувьд Ц.Элбэгдорж, Х.Баттулга, У.Хүрэлсүх+С.Баярцогт /маажвал Ажнай ч цухуйна/ нарын бүлэглэл, эдийн засаг, бизнесийн талаас MCS, МАК, АПУ, Монцемент тэргүүтэй хөрөнгөтөн олигархиуд.
Тэдний хоорондын зөрчил, тэмцэл, эвсэл, нэгдэл ямар байхаас Монголын улс төрийн бүрэн зураглал харагдана. Тэдний гараар Засгийн газрын хувь тавилан зурагдана. Өөрөөр хэлбэл мөнгө, эрх мэдэл хэн дор байна, түүн дор Засгийн эрх захирагдана. Улсаасаа баян болчихсон олигархиуд улс гэрээрээ тоглож байгаа нь энэ.
Л.Оюун-Эрдэнийн Засгийн газрыг унагах төлөвлөгөөний цаад эзэн тэгвэл хэн бэ? Оюукт “Чадахгүй бол ажлаа өг” гэж Ерөнхийлөгчийн амаар хэлүүлсэн хүн нь Н.Номтойбаяр байж болох уу? Ингэж хардах үндэслэл бий юу?
УИХ-д сонгогдохын тулд бүхэл бүтэн нам худалдаж аваад, үхрийн бөөр шиг алаг цоог “Үндэсний эвсэл” гэгчийг байгуулан, дөрвөн суудал авчихсан МАК-ын хунтайжид зангирсан булчин шигээ зангирсан өс бий. АН-ын угшилтай Д.Пүрэвдаваа, түүний дагуул М.Сарнай, МАН тэр дундаа М.Энхболдын фракцаас угшилтай А.Ундраа нарыг хөтлөөд парламентад ороод ирчихсэн түүнд одоо улс төрийн эрх мэдэл /power/ л хэрэгтэй.
Тэрээр 2024 оны УИХ-ын сонгуульд орохын тулд Ногоон намыг худалдаж авсан. Ингэхдээ тус намын дарга О.Бум-Ялагчид 2 тэрбумаас багагүй мөнгө төлсөн хэмээх барим тавим яриа хардлагын түвшинд явдаг. Учир нь Улсын дээд шүүхэд бүртгүүлсэн эрэмбээрээ сонгуулийн саналын хуудасны гуравдугаарт бичигддэг Ногоон намыг “худалдан авах” сонирхол Н.Номтайбаяраас ч өмнө гарч байсан гэдэг. Жишээ нь, Н.Энхбаяр МАХН-ын дарга байхдаа 1.5 тэрбум төгрөгөөр Ногоон намыг халаасандаа хийж, нэр дэвшигчдийг нь санхүүжүүлэх санал тавьж байсан аж. Арав гаруй жилийн өмнөх энэ ханш 2024 онд хэд нугарсан байхыг үгүйсгэхгүй. Юутай ч Ногоон нам ноднингийн сонгуулиар “Үндэсний эвсэл”-ийн халаасанд багтаж, худалдан авагчийг нь УИХ-ын гишүүн болгосон.
Эргэн сануулахад Н.Номтойбаярыг 2020 оны УИХ-ын сонгуульд Хан-Уул дүүрэгт бие даан нэр дэвшин өрсөлдөж байхад нь баривчлан саатуулж, улмаар анхан шатны шүүхээс 5,5 жилийн ял оноосон. Энэ өс хонзонгоо тэр өнөөдөр тайлж ядан, өшил өшин, хясал хясан буй. Тиймээс хамтарсан Засгийн газраас АН-ыг гаргаж, хоёрдугаар ээлжийнхэн хоолондоо орох боломжийг нээх сценари Үндэсний эвслийн тэргүүний гараар зурагдсан байх өндөр магадлалтай. Ямартаа л түүний намынхан сарын өмнөөс дээр дооргүй хөдөлгөөнд орж, хаана очих албан тушаал тодорхой, костюм, туфлиэ зэхэж эхэлсэн байхав. Албан бус эх сурважлийн мэдээллээс үзвэл дараагийн засагт Н.Номтойбаяр Тэргүүн Шадар сайд бөгөөд Үндэсний эвсэлийн авах яамд ч тодорхой яригдсан аж. Өөрөөр хэлбэл УИХ-ын гишүүн болохын тулд нам худалдаж авсан хунтайж энэ удаад Засагт орохын тулд Монголын хөрөнгөтнүүдийг багцлан хөдөлгөж, АН-ыг тийрч, Засгийн газрыг унагасан болж таарч байгаа юм. Гадаах жагсаалын ард MCS байгаа гэж байгаа ч ахиухан маажвал МАК бүр цааш ухвал АПУ, Монцемент, бидний эзэн “сахал” Д.Эрдэнэбилэг адаг сүүлдээ Эби гарч ирэх вий.
Угаас хамтарсан Засгийн газар Үндэсний эвсэл төдийгүй дээр нэр дурдагдсан эздийн бизнесийн эрх ашгийг хамгийн ихээр хөндөж буй. Н.Нямтайширын гэр бүлийн эзэмшдэг 36 орд дунд Цагаан суварга, Нарийн сухайтын гэсэн стратегийн ордууд бий. MCS-д Ухаа худаг бий. Ард нь АПУ зогсож байгаа.
Эдүгээгийн Ерөнхийлөгч У.Хүрэлсүх Ерөнхий сайд байхдаа МАК-ын эзэмшдэг Цагаан суваргын ордыг төрд авна гэж мэдэгдэж байв. Харин хамтарсан Засгийн газар стратегийн ордуудын 34 хувийг төрд өөрөөр хэлбэл Баялгийн санд төвлөрүүлэхээр үзэлцэж буй. Чухам үүний эсрэг MCS, МАК хоёр эрх ашиг нь нэгдэж байгаа.
Мөнхийн дайсан гэж үгүй, мөнхийн эрх ашиг гэж л байдаг хойно. Ийн Оюукын Засгийн газрыг огцруулах хувьсгалын тохироо бүрдсэн. Энэ бүхний эцэст нэг талд өмч хөрөнгөө нийгэмчлүүлэхгүй гэсэн үндэсний хөрөнгөтнүүд, нөгөө талд эрх мэдэлд улайрсан улстөрчид нийлэхээрээ УИХ, Засгийн газрыг өөрсдийн хүслээр унагж, босгодог муу жишиг тогтох вий гэдэг айдас, болгоомжлол бидэнд байх ёстой.
Улсаасаа баян болчихсон үндэсний хөрөнгөтнүүдэд парламентын кноп 76 ч бай, 126 ч бай ялгаагүй. Ч.Лодойсамбуу гишүүн “Засгийн газрыг авч үлдэхийн тулд хоёр их наяд төгрөг тараасан гэж сонслоо” хэмээн мэдэгдсэнийг бодоход авч үлдэх ч бай, унагах ч бай, ямар ч байсан энэ хэмжээний мөнгөөр Засгийн газрын хувь заяаг шийдэж болдог байх нь гэсэн хар төрж байгаа юм.
Н.Номтойбаяр ба түүний нөхдийн ганц сул тал нь мөнгөтэй. Тиймээс энэ хэрийн мөнгийг тэд төрийн эрх мэдлийн төлөө цацсан байхаас сийхгүй.
Дараагийн хамтарсан Засгийн газрын Тэргүүн Шадар сайдын суудалд МАК-ын хунтайж суух магадлал өндөр байна.
Г.Ууганбаатар
