Хууль зүйн сайд С.Амарсайхан “хамтрахгүй” гэж мэдэгдсэн дэд сайд Д.Мөнх-Эрдэнийг сольж чадахгүй байгаагийн шалтгаан юу вэ

“Би ямар ч албан тушаалд очихгүй” гэж хэлснээсээ хойш яг 24 цагийн дараа Хууль зүйн дотоод хэргийн сайдаар томилогдсон С.Амарсайхан салбартаа багагүй томилгоо хийж өөрчилнө гэж мэдэгдсэн. Мөн Засгийн газрын хуралдааны үеэр "Дэд сайд Д.Мөнх-Эрдэнэтэй сайдын хувиар хамтран ажиллах боломжгүй" гэсэн байр сууриа илэрхийлээд нэг сар өнгөрч байна. Гэсэн хэдий ч өнөөдрийг хүртэл Д.Мөнх-Эрдэнэ Хууль зүйн дэд сайдаар ажилласан хэвээр байгаа нь анхаарал татаж байгаа юм.

Хууль зүйн сайд С.Амарсайхан бол 30-ын тал буюу Д.Амарбаясгалангийн талын хүн. Өөрөөр хэлбэл цөөнхийн талаас сонгогдсон таван сайдын нэг. Харин дэд сайд Д.Мөнх-Эрдэнэ бол 36-ын тал буюу Б.Энхбаярын баруун гарын хүн гэж хэлж болно. Тиймээс С.Амарсайхан дэд сайдаа шинээр томилоход гайхах зүйл байхгүй. Гэтэл өнөөдрийг хүртэл Д.Мөнх-Эрдэнийн томилгоог хөндөж яадахгүй байгаагийн шалтгаан юу вэ?

Зарим эх сурвалжийн мэдээллээр, Хууль зүйн сайд С.Амарсайхан дэд сайдаа сольж чадахгүй байгаа нь нөгөө талтай /36-ын тал/ хийсэн бас нэг тохироо гэх өнцөг яригдаж байна. Нөгөөтээгүүр, төрийн ордонд өдөр алгасахгүй хөндөгдөж байсан хэдэн их наядын хулгай луйврын хэргүүдийг С.Амарсайхан сайд огт хөндөхөө больсон. Энэ нь эрх мэдэл өндөр албан тушаалд очоод улс төрийн хулгай луйвраа хав дарах болсон уу гэх хардлага төрүүлж байгаа юм.

Дэд сайд Д.Мөнх-Эрдэнийн хувьд Засгийн газрын хуралдаанаас гарч ирээд сэтгүүлчдэд "Би үргэлжлүүлэн ажиллах болсон" гэдгээс өөр дэлгэрэнгүй мэдээлэл өгөлгүй өнгөрсөн. Түүнийг их хэмжээний авлигалд холбоотой гэх баримтыг Бодь группийн гүйцэтгэх захирал асан А.Амундра дэлгэсэн билээ. Түүнчлэн А.Амундра Монголын хууль хүчний байгууллагууд гэрчийн хамгаалалтад авбал эх орондоо ирж мэдүүлэг өгөх хүсэлтээ АТГ-т албан ёсоор уламжилсан юм.

Тиймээс Хууль зүйн яамны дэд сайдын томилгоо одоог хүртэл олны анхаарлыг татсан хэвээр байна.

М.Үүрийнтуяа