Хөшигний ард: Л.Оюун-Эрдэнэ эцсийн бооцоогоо АН-ынханд тавьж байна
Ерөнхий сайд Л.Оюун-Эрдэнэд итгэл хүлээлгэх эсэх асуудлыг УИХ ирэх Даваа гаригт эцэслэн шийдэхээр болоод буй.
УИХ дахь намын бүлгүүдийн хурлын дараа 12 цагт Төрийн байгуулалтын байнгын хорооны хуралдаан болох бөгөөд хуралдаанд Ерөнхий сайд өөрийн биеэр оролцож тогтоолын төсөлтэй холбоотойгоор Байнгын хорооны гишүүдийн асуултад хариулт өгөх аж. Байнгын хорооны хуралдаанаас Ерөнхий сайдад итгэл үзүүлэх эсэх тухай асуудлаар санал хурааж дүгнэлт гаргах бөгөөд гарсан дүгнэлтийг 14 цагт зарлагдсан УИХ-ын нэгдсэн чуулганы хуралдаанд танилцуулах аж.
Тэгвэл Л.Оюун-Эрдэнэд кабинетээ авч үлдэх боломж бий юу? МАН-ын гишүүдийн тухайд Бага хурлаасаа авахуулаад дийлэнх олонх нь эсрэг талд гарчихсан байгаа. Түүнд итгэл үзүүлэх кнопны тоо 63+1, 64 хүрэхэд АН шийдвэрлэх үүрэг гүйцэтгэнэ гэсэн үг. Эх сурвалжийн мэдээлсэнээр Л.Оюун-Эрдэнэ эцсийн найдвараа АН-ын гишүүдэд дайж байгаа бөгөөд Даваа гаригийн өглөө хуралдах АН-ын Бүлгийн хуралдаан руу МАН-ын дарга, манай улсын Ерөнхий сайд өөрийн биеэр оролцож, надад эцсийн удаа итгэл үзүүлээч хэмээн гуйж гувшин эцсийн бооцоогоо тавих аж. Өдгөө Л.Оюун-Эрдэнийн кабинетэд байгаа АН-ын 8 сайд эргэж харах нүүрээ бодон итгэл үзүүлэх кноп дарж болох ч үлдсэн жирийн гишүүд хаашаа эргэхийг таахад бэрх. Женко Х.Баттулгын гарын итгэлтэй гишүүд ч цөөнгүй байгаа гээд бодвол яаж ч магадгүй эгзэгтэй, эн тэнцүү тулаан болох болов уу.
Эцсийн бүлэгт Л.Оюун-Эрдэнэ үлдвэл буруутнаар АН-ынхан нэрлэгдэнэ гэсэн үг. Орлогоо нотолж чадаагүй Л.Оюун-Эрдэнийн үйл лай, үүдэх асуудлыг үүрч дүүрэлцэх үү, орхисон шиг орхих уу гэдгээ АН-ын гишүүд энэ амралтын өдрүүдэд шийдэх нь ээ.
З.Жав
