Л.Оюун-Эрдэнийн хувь заяаг шийдэх 126 кнопны задаргаа
Ерөнхий сайд Л.Оюун-Эрдэнэд итгэл үзүүлэх эсэх асуудлыг өнөөдөр үдээс хойш УИХ-ын чуулганы нэгдсэн хуралдаанаар хэлэлцэнэ. Өөрөөр хэлбэл 126 гишүүн анх удаагаа Засгийн газрын хувь заяаг дэнслэх гэж байна.
УИХ-ын 126 гишүүнийг намын харьяаллаар авч үзвэл:
- МАН 68,
- АН 42,
- ХҮН 8,
- Үндэсний эвсэл 4,
- ИЗНН 4 суудалтай.
Ерөнхий сайд Л.Оюун-Эрдэнэд итгэл үзүүлэх асуудалд намуудын нэгдсэн байр суурь гэхээс илүү хувь улстөрчдийн хандлага, үзэл бодол, эрх ашиг, сонирхол илүүтэй нөлөөлөх болов уу. Өөрөөр хэлбэл МАН дотор Л.Оюун-Эрдэнийг унагах сонирхолтой гишүүд байгаатай адил АН дотор Л.Оюун-Эрдэнийг дэмжих бүлэглэл ч бий. ХҮН намынхан мэдээж Хамтарсан Засгийн газраас гарахгүй гэж чичирч байгаа тул наймуулаа Ерөнхий сайдад итгэл үзүүлэх болов уу. Магадгүй дараагийн Засаг байгуулагдсан ч ХҮН-ийг оруулна гээд тохироо хийчихээгүй бол шүү дээ.
Харин Үндэсний эвсэл хийгээд ИЗНН-ынхан хоёрдугаар ээлжинд хоолондоо орох гэж яарч байгаа тул Оюукийн эсрэг кноп дарна. Гэхдээ Л.Оюун-Эрдэнэ Ерөнхий сайдаараа үлдвэл дараагийн танхимдаа тэднийг оруулна гэдгээр тохироо хийчихсэн байхыг мөн үгүйсгэхгүй.
МАН, АН-ын гишүүд аль талд кноп дарах вэ гэдэг хамгийн адармаатай асуудал. Юутай ч МАН-аас хэн Л.Оюун-Эрдэнэд итгэл үзүүлэхгүй вэ эсрэгээрээ АН-аас хэн итгэл үзүүлэх вэ гэдэгт урьдчилсан прогноз хийж үзье.
МАН – Л.Оюун-Эрдэнийг дэмжихгүй байж мэдэх гишүүд:
- С.Амарсайхан
- Б.Батцэцэг
- Д.Бум-Очир
- С.Бямбацогт
- Б.Жавхлан
- С.Лүндэг
- Т.Мөнхсайхан
- З.Мэндсайхан
- Ч.Номин
- У.Отгонбаяр
- Г.Тэмүүлэн
- Н.Учрал
- Ж.Энхбаяр
- Б.Энхбаяр
- Д.Энхтүвшин
АН – Л.Оюун-Эрдэнийг дэмжих магадлалтай гишүүд
- О.Алтангэрэл
- Н.Алтанхуяг
- Ц.Баатархүү
- Х.Баттулга
- С.Ганбаатар
- Д.Жаргалсайхан
- Л.Мөнхбаясгалан
- Э.Одбаяр
- Ц.Туваан
- Х.Тэмүүжин
- Ө.Шижир
- Д.Энхтуяа
- Р.Эрдэнэбүрэн
УИХ-ын нийт 126 гишүүний олонх буюу 64 нь одоогийн Ерөнхий сайдад итгэл хүлээлгэхээр дэмжсэн кноп дарсан тохиолдолд Л.Оюун-Эрдэнэ ажлаа үргэлжлүүлэх боломжтой болно. Дээрх задаргаанаас анализ хийж үзэхэд МАН-ын 68 гишүүний 15+ орчим нь намын даргынхаа эсрэг санал өглөө гэхэд АН-аас тэр анзааны гишүүн МАН-ын даргыг дэмжих болов уу. Дээр нь ИЗНН, ХҮН намынхныг багцалж чадах юм бол Л.Оюун-Эрдэнэ 70 гаруй гишүүний саналаар суудалдаа үлдэх магадлалтай.
Гэхдээ энэ бол таамаг төдий. Өнгөрсөн амралтын өдрүүдэд талууд эцсийн хороо хийж, тохироогоо тохиролцсон байж таарна. Таах аргагүй. Тайзан дээр бэлдсэн жүжиг л тавигдана. Найруулагчид нь аль хэдийнэ зохиолоо батлуулчихсан суугаа биз ээ.
Г.Ууганбаатар
