Шатар сайн тоглодог Г.Занданшатарын дараагийн НҮҮДЭЛ юу вэ?
Монгол Улсын 34 дахь Ерөнхий сайдаар УИХ-ын дарга асан, ЕТГ-ын дарга Г.Занданшатар ажиллах нь тодорхой болов. Учир нь Бага хурлын гишүүдийн 67 хувийн саналаар Г.Занданшатарыг дараагийн Ерөнхий сайдад нэр дэвшүүлэхээр дэмжлээ.
Ингээд Ерөнхий сайдын сэнтийд хүрэх процессс цааш үргэлжилнэ. Түүнийг Монгол Улсын Ерөнхий сайдаар томилох эсэхийг УИХ-ын чуулганы нэгдсэн хуралдаанаар эцэслэн шийдэх юм.
Шинээр томилогдсон Ерөнхий сайд өөрөө Засгийн газраа бүрдүүлж УИХ-д танилцуулна. Засгийн газраа бүрдүүлэх нь Ерөнхий сайдын бүрэн эрх байхаар хуульд заасан байдаг ч өөрийнхөөрөө бүрдүүлэх боломжгүй. Одоо олон нийтийн дунд дахин нэг хүлээлт үүсгээд байгаа зүйл бол МАН дангаараа засаглах уу? Парламент дахь намуудтай нэгдэж их эвсэлийн засгийн газар байгуулах уу гэдэг.
Хэрэв их эсвэлийн Засгийн газар байгуулагдвал Тэргүүн шадар сайдаар Н.Номтойбаяр томилогдож, ИЗНН засагт суудал авах хувилбар яригдаж буй. Эс бөгөөс МАН дангаараа засаглавал хэт их сөрөг хүчинтэй тулгарах эрсдэлтэй юм.
Өчигдөрийн бага хуралдаанаар Гадаад харилцааны сайд Б.Батцэцэг сэтгүүлчдэд мэдээлэл өгөхдөө Ерөнхий сайдад нэр дэвшиж байгаа хоёр гишүүн хоёулаа дангаараа засаглана гэсэн байр суурьтай байна гэж мэдэгдсэн.
Тэрбээр,
“Г.Занданшатар дарга эрх зүйн хувьд дангаараа засаглах, намын гишүүдийнхээ хүсэлтийг харгалзана гэсэн зүйлийг ярьсан. Мөн хоёр нэр дэвшигчид хоёул төсөвт тодотгол хийх ёстой гэсэн байр суурийг илэрхийлсэн. Ерөнхий сайд танхимаа яаж бүрдүүлэх талаар олон санал гарсан. Ямар сайд тавихаа яриагүй. Миний хувьд санал тавибал ажлаа үргүүлжлүүлээд хийнэ. Ажлаа өг гэвэл өгөх гээд бэлдчихсэн байгаа. Г.Занданшатар даргын хувьд сонгуульд ялж, ялагдаж үзсэн хүн. Сонгогдоогүй, гишүүн биш гэдэг нь Г.Занданшатар даргын хувьд харгалзан үзээд байх шалтгаан биш гэж бодож байна. Олон удаа сонгогдож, хоёр удаа парламентын даргаар, хоёр удаа сайдаар ажиллаж байсан, туршлага мэдлэг, боловсрол зэргээр асуудал байхгүй. Шууд ажлаа хийх боломжтой хүн. Г.Тэмүүлэн гишүүний хувьд ч эдийн засагч, дипломатч хүн. Түүнийг дэмжиж байгаа олон залуус байсан" гэв.
УЗ-ийн гишүүд нь шатар сайн тоглодог хэмээн тодотгосон Г.Занданшатар ямар нүүдэл хийх нь удахгүй тодорхой болно.
