ЕТГ-ын даргаар Ч.Хүрэлбаатар томилогдох уу

Ерөнхийлөгчийн тамгын газрын даргаар хэн томилогдох вэ? Энэ асуулт улс төрийн хүрээлэлд Ерөнхий сайд, Засгийн газраас дутахгүй анхаарал татахуйц байна. 2024 оны парламентын сонгуулиар ард түмний итгэлийг авч чадалгүй гашуунаар мултарсан Г.Занданшатарыг Ерөнхийлөгч дэргэдээ авчирсан. Энэ бол хэрийн хүүд олдохгүй боломж. Одоо түүнийг Монгол Улсын Ерөнхий сайдаар томилохоор улайрч байна.

Үүний хойно Ерөнхийлөгчийн Тамгын газрын даргын томилгоо эзнээ хүлээж буй. Ерөнхийлөгч У.Хүрэлсүхийг томилогдсоноос хойш хоёр удаа ЕТГ-ын дарга солигдсон. Эхнийх нь Я.Содбаатар байсан бол удаах нь Г.Занданшатар. Тэгвэл одоо энэ суудалд Эдийн засаг хөгжлийн сайд асан Ч.Хүрэлбаатар, Г.Ганболд нар яригдаж байна.

ОХУ-ын Ленинград хотын Санхүү эдийн засгийн дээд сургууль, Австралийн Сидней их сургуулийг эдийн засагч мэргэжлээр тус тус төгссөн Ч.Хүрэлбаатар Засгийн газрын гишүүнээр таван удаа томилогдон ажиллаж байсан бол УИХ-д дөрвөн удаа сонгогдон ажилласан юм.  Тодруулбал, С.Баярын Засгийн газрын үед Түлш эрчим хүчний сайд, С.Батболдын Засгийн газрын үед ЗГХЭГ-ын дарга, У.Хүрэлсүхийн Засгийн газарт хоёр удаа Сангийн сайд, Л.Оюун-Эрдэнийн танхимд Эдийн засаг хөгжлийн сайдаар ажиллаж байв. Товчхондоо түүнд Засгийн газар, УИХ-д хашаагүй албан тушаал, хүрээгүй тамга гэж бараг үгүй.

Харин Гочоогийн Ганболдын тухайд, улс төрийн хүрээллийнхэн түүнийг төлөвшсөн, боловсрсон улс төрч гэгддэг. УИХ-ын 2024 оны сонгуульд мөн л өвдөг шороодсон. Одоо Ерөнхийлөгчийн Хот хөдөөгийн бодлого хариуцсан зөвлөхөөр ажиллаж буй.