ЭМДС-гаас Баянзүрх, Бриллиант эмнэлгүүд 30 гаруй тэрбум төгрөгийн “санхүүжилт” авчээ

Иргэд улсын, хувийн аль ч эмнэлэгт хөнгөлөлттэй үнээр эмчилгээ үйлчилгээ авах гэж ЭМДаатгалыг сар бүр төлдөг. Гэтэл олон жил даатгалаа төлчихөөд одоо эмнэлэгт дахиад төлбөр төлж үйлчилгээ авах, төлбөр төлж хагалгаандаа орох хүнд нөхцөл байдал үүсээд байна. Нэг үгээр,  ЭМДаатгалын сан эмнэлэгүүдэд санхүүжилтээ олгож чадахгүй ХООСОРХОД хэдхэн сар үлдсэн гэхэд хилсдэхгүй.

Тэгвэл энэ хүнд асуудал юунаас үүдсэн бэ. Хэт үрэлгэн санхүүжилтээс үүсэв үү, хэлбийдсэн албан тушаалын ар өврөөс үүдсэн үү? Одоо үүний учрыг тайлж, хужрыг тунгаая. Анхаарлаа хандуулна уу?

Эрүүл мэндийн даатгалын сангийн Санхүүжилтыг судалж үзвэл, 2025 он гарсаар улсын эмнэлэгт нийт 800 гаруй тэрбум, хувийн эмнэлэгт 240 тэрбум төгрөгийн санхүүжилт олгожээ. /Баримтыг хавсаргав/

Хувийн эмнэлэгийн санхүүжилтийг шүүвэл, хамгийн өндөр дүнгээр Баянзүрх эмнэлэг, Бриллиант эмнэлгүүд  нийт 30 гаруй тэрбум төгрөгийн санхүүжилт авчээ. Баянзүрх эмнэлэг 19.4, ТЭРБУМ, “БРИЛЛИАНТ” эмнэлэг 18.3 ТЭРБУМ  төгрөг.

Эдгээр эмнэлэгүүдэд энэ их санхүүжилтийг олгосон шалтгааныг ЭМДСангаас тодруулахад, Тэрбээр хэлэхдээ, “ЭМДСан 2025 онд 1 их наяд 2 сая 93 мянган төгрөг зарцуулах ёстой. Өнөөдрийн байдлаар нэг их наяд наян гурван мянган төгрөгний санхүүжилт олгосон байна. Хувийн эмнэлэгүүдэд өндөр санхүүжилт олгогдсон учир нь өнгөрсөн оны өглөгтэй хамт олгогдож байгаа юм. Тодруулбал, 2024 оны өглөг бол 2021 оноос хойш 2022, 2023 онд үүсээд явж байгаа өглөг юм. 2023 онд 216 тэрбум төгрөгийн өглөгтэй байсан бол  2024 онд 316.8 тэрбум төгрөгийн өглөгтэй гарсан. Энэ бол тусламж үйлчилгээний нэмэгдэлтэй холбоотой. Тусламж үйлчилгээ гүйцэтгэлээр санхүүжилттэй холбоотой эрүүл мэндийн байгууллагууд өнгөрсөн онуудад ямар ч төсвийн хязгаарлалтгүйгээр санхүүжилт олгож явж байгаад үүнтэй холбоотойгоор тухайн эрүүл мэндийн байгууллагуудаас гүйцэтгэл нь өндөр орж ирдэг. Анх 2021 онд 8 сая хүн тусламж үйлчилгээ авч байсан бол 2024 онд 11 сая тохиолдол болж 3 саяар нэмэгдсэн гэсэн үг. Үүнээс шалтгаалж өр үүсдэг. Бид жил бүрийн төсвийг өсөлттэй төлөвлөдөг ч тэр хэмжээнээс өндөр санхүүжилт үүсэх шаардлага гарч байдаг” гэв.  

Тэгвэл энэ их санхүүжилтээр улсаас тэжээгдэж иргэдээс ч тоймгүй их мөнгө татаж байгаа Бриллиант эмнэлэгийг тодотгоё. Уг эмнэлэгийг олон талын баримт, мэдээлллээс судалж үзэхэд эрх бүхий албан тушаалтны дэмжлэгээр, ар өврийн хаалгаар дээрх санхүүжилтыг авч байгаа болов уу гэж хардалт төрмөөр.

 Учир нь Эрүүл мэндийн сайд асан С.Энхболдын найз Эрүүл мэндийн яамны Бодлого, төлөвлөлтийн газрын даргаар ажиллаж байсан Батсүхийн Буянтогтох уг эмнэлгийн хувьцаа эзэмшигч, гүйцэтгэх захирлаар нь ажиллаж байсан. Тодруулбал, Б.Буянтогтох нь С.Энхболд сайдтай эртнээс ойртож, хаа явсан газар нь хамт явсаар одоогоос дөрвөн жилийн өмнө ЭМЯ-ны бодлого төлөвлөлтийн газрын дарга болтлоо дэвшсэн. Харин одоо Эрүүл мэндийн  сайд асан С.Энхболд ЭМДЕГ-ын даргаар ажиллаж буй.

Тэгэхээр өөрийн албан тушаалаа урвуулан ашиглаж Сайд асан С.Энхболд хамаарал бүхий этгээдийнхээ эмнэлэгт илүү өндөр санхүүжилт олгож байна уу гэсэн хардлага төрөхөөр.

Брилиант эмнэлэг нь 2016 онд дүрс оношилгоо, лаборатори, хөнгөвчлөх тусламж үйлчилгээний чиглэлээр байгуулагдсан. Одоо Эцсийн өмчлөгчөөр нь Доржнамжингийн Бархүү, Баасанжавын Ганбат нар бүртгэлтэй байдаг.

Доржнамжингийн Бархүү бол Б.Буянтогтохын эхнэрийн төрсөн дүү юм.

Үүнээс үзэхэд, ЭМДСан гэх алтан авдартай энэ айлын мөнгө санхүү дээр дарга нар нь дураараа туйлж, хойно нь ард иргэд өвчин зовлондоо шаналан, эмнэлэгийн хаалга манаж хандивын аянд нэрвэгдэж байгаа нь өнөөдрийн бодит байдал.

Эрүүл мэндийн салбар руу өнгөцхөн өнгийхөд ийм байна. Дүгнэх эрхийг үзэгч танд үлдээе.