Үндэсний эвсэл, ХҮН, ИЗНН-ууд Засгийн газартай хамтарч ажиллах эсэхээ өнөөдөр шийднэ

Ерөнхий сайд Г.Занданшатар өчигдөр буюу Даваа гарагт УИХ-д суудалтай ХҮН, ИЗНН, Үндэсний эвсэлийн дарга Н.Номтойбаяр нарт Засгийн газартай хамтарч ажиллах санал хүргүүллээ.

Тэгвэл өнөөдөр тус намууд хуралдаж Засгийн газарт багтаж ажиллах эсэхээ шийдэх юм.

Ингээд Г.Занданшатарын Засгийн газар Их эвсэлийн Засгийн газраа бүрдүүлэх нь тодорхой болов. Гэхдээ энэ удаа Ардчилсан нам хаалганы цаана үлдэх нь.

Урьдчилсан таамгаар, Үндэсний эвсэлийн дарга Н.Номтойбаяр Шадар сайд болж ИЗННамын дарга Б.Батбаатар Байгаль орчин, уур амьсгалын өөрчлөлтийн яамны сайдаар томилогдох магадлал бий.

Харин Ардчилсан намын зүгээс Ерөнхий сайд Г.Занданшатарт дараах шаардлагуудыг хүргүүлээд байгаа юм. Тухайлбал,

“Шинэ Засгийн газрыг байгуулахдаа яам болон сайд нарыг тоог 50 хувиар бууруулах, төрийн захиргааны болон тусгай албан хаагчдын тоог 20 хувиар бууруулах, төрийн албаны мэргэшсэн тогтвортой байх нөхцлийг хангаж,  ашиг сонирхлын зөрчлийг таслан зогсоох.

Төрийн өмчит аж ахуй нэгжийг олон нийтийн нээлттэй хувьцаат компани болгох, орон тоог хоёр дахин буруулж, үр өгөөж бүтээмжийг  эрс нэмэгдүүлэх.

Төрийн хэмнэлтийг хэрэгжүүлэх замаар төрийн хүнд суртал, хяналт шалгалт татварын дарамтаас бизнес эрхлэгчдээ чөлөөлж, хувийн өмч болон хөрөнгө оруулагчдын эрх ашгийг хамгаалах. Хувийн хэвшилд ногдох татварын дарамтыг 20 хувиар бууруулах.

2025 онд 20 мянган ажлын байр шинээр бий болгох.

2025 оны улсын нэгдсэн төсвийг тодотгож улсын урсгал зардлыг 20 хувиар танах, төсвийн худалдан авалт, хөрөнгө оруулалтын бодлогоо үндэсний аж ахуй нэгжийг дэмжих буюу тендерийг зөвхөн үндэсний компаниудын дунд зарлах.

Мега төслүүдийг эдийн засгийн үр өгөөжийн хувьд эрэмбэлэн үр өгөөжгүй төслүүдийг хасах” зэрэг шаардлагууд багтжээ.