Гэр бүл, төрсөн охиноо хөсөр хаясан Т.Аубакир гэж ХЭН БЭ?

Төрсөн охиндоо зарцуулах тэтгэмжийн мөнгөн дээр эцэг хүний зангараг дутаж. Тэгвэл төр төлөөлж сайдын сэнтийд заларсан энэ хүн түмэн олны хүүхдийн асуудлыг хэрхэх вэ?

Ерөнхий сайд Г.Занданшатарын танхимд олны шүүмжлэлийг дагуулж буй хэд хэдэн сайд бий. Тухайлбал, улиран ажиллаж буй Эрчим хүчний сайд Б.Чойжилсүрэн, Зам тээврийн сайд Б.Дэлгэрсайхан мөн шинээр томилогдсон Батлан хамгаалахын сайд Д.Батлут, Эрдэс баялаг, уул уурхайн сайд Г.Дамдинням, Гэр бүл, нийгмийн хамгааллын сайд Т.Аубакир нарыг олон нийт шүүмжлэлтэй хүлээж авсан. Ялангуяа Т.Аубакир сайдыг боловсрол, ажлын туршлага дутмаг, ёс суртахууны асуудалтай гэж олон нийт харж буй.

Очиж очиж хувийн амьдрал, ёс суртахууны тухайд тэр чигээрээ сөрөг дататай хүн Гэр, хөдөлмөр, нийгмийн хамгааллын сайдаар томилогдсон нь утга зохиолын хэлээр бол хувь тавилангийн даажин гэлтэй.

Тодруулбал, Т.Аубакир сайдын охин Даяана хэдэн жилийн өмнө эцгээрээ овоглохоос татгалзаж буйгаа олон нийтэд зарлаж байв. Тэрбээр “Өнөөдөр би Аубакир гэдэг овгоос татгалзах шийдвэр гаргалаа. Би хэн нэгний бутач хаягдмал хүүхэд биш. Даяана гэдэг хүн. Надтай холбоотой ямар ч овог, гэр бүлийн нэр хамаагүй” хэмээн өөрийн фэйсбүүк хуудастаа бичсэн нь чамгүй шуугиан тарьж байв. Төрсөн охиндоо зарцуулах тэтгэмжийн мөнгөн дээр Т.Аубакир гишүүн хорголоо тоолсон байдаг.

Казак ард түмэн маш гэр бүлсэг, Т.Аубакир гишүүн овоо хөрөнгөлөг нэгэн. Өөрөөр хэлбэл Т.Аубакирт төрсөн охиндоо зориулах эцэг хүний хайр, хүн мөн чанар дутагдсан гэсэн үг. Ийм хүн гэр бүл, нийгмийн хамгааллын салбарыг удирдана гэдэг утгаараа асуултын тэмдэг.

Т.Аубакиртай холбоотой дуулиан үүгээр зогсохгүй. Саяхан Бангкок хотод Монгол Улсаа төлөөлөн сууж байсан Элчин сайд А.Төмөрийн эхнэр Л.Орхон өндрөөс унаж нас барсан харамсалтай хэрэг гарсан. Уг хэргийг талийгаачийн ар гэрийнхэн гадны нөлөөтэй, бүр тодруулбал талийгаачийн нөхөр А.Төмөрийн нууц амрагийн харилцаанаас үүдэлтэй гэж үзэж буйгаа илэрхийлсээр буй. Тэгвэл А.Төмөртэй нууц амрагийн харилцаатай байсан жүжигчин Б.Сэтгэлтүвшин буюу Сауле нь Т.Аубакир гишүүний төрсөн эгчийн охин юм.

Гэрээ засаад төрөө зас гэх үг бий. Түмэн олны гэр бүл, нийгмийн асуудлыг цэгцлэн чиглүүлэх хүний гэр бүл тогтвортой, ёс зүй, ёс суртахууны хувьд шилэгдмэл биш юм аа гэхэд ердийн байх учиртай.

ТЭГВЭЛ Т.АУБАКИР ГЭЖ ХЭН БЭ?

Казах түмний төлөөлөл түүнийг том ах нарынхаа дэмжлэгээр улс төрд орж ирсэн гэдэг. Тэрбээр “Отгонтэнгэр” дээд сургуулийг олон улсын эрх зүйч мэргэжлээр төгссөн байдаг. Гэвч мэргэжлээрээ ажиллаагүй. Гаалийн байгууллагад ажилласны зэрэгцээ газар тариалангийн салбарт голлон ажиллаж байжээ. Мөн Казахстан улсад бизнес эрхэлж байсан бөгөөд бизнес эрхэлж байсны хүчинд тэрбумтан болсон гэдэг. МАН-ын мөнгөлөг гишүүдийн тоонд багтаж газардахгүй яваа улс төрч.

Тэрбээр УИХ-ын гишүүн болохоосоо өмнө Хүнс хөдөө аж ахуйн дэд сайд болохоор зүтгэж, МАН-ын Удирдах зөвлөлөөр дэмжүүлсэн ч АТГ-т шалгагдаж байсан асуудлаасаа болоод мултарсан.

Чанаргүй буудай улсад нийлүүлсэн асуудалтай, мөн газар тариалангийн бизнес эрхэлдэг нь ашиг сонирхлын зөрчил үүсгэнэ гэж үзэн зөвшөөрөөгүй байдаг.

АЖИЛЛАСАН БАЙДАЛ

2000-2005 онд Сэлэнгэ аймгийн “Сэлэнгэ тариа” ХХК-ийн дэд захирал
2006-2015 онд “Тариан цацал” ХХК-ийн захирал
2015-2016 онд Гаалийн ерөнхий газрын Дотоод аудит, мониторингийн газрын дарга
2017-2019 онд Гаалийн ерөнхий газрын харьяа Буянт-Ухаа дахь гаалийн газрын орлогч дарга
2008-2015 онд Баян-Өлгий аймгийн НАМЗХ-ны дарга
2020-2024 онд Монгол Улсын Их Хурлын гишүүн
2024 оноос Монгол Улсын Их Хурлын гишүүн