АХМАДУУД: Тэтгэвэрийн асуудлыг шийдэхгүй бол тэмцлийн хурц хэлбэрт шилжинэ

Монголбанкны Мөнгөний бодлогын хороо энэ сарын 12, 13-нд хуралдаж, бодлогын хүүг одоогийн 12%-д нь хадгалах, тэтгэврийн зээл олгох дээд хязгаарыг 50% болгож өөрчлөхөөр шийдвэрлэсэн.

Энэ шийдвэрийг ахмадууд эсэргүүцэж, Сүхбаатарын талбайд ес дэх хоногтоо суулт зарлаж байна.

"ТЭТГЭВРИЙН ЗЭЭЛИЙН САН 11.7 ТЭРБУМЫН ЭРСДЭЛД ОРОХ ЯМАР Ч ҮНДЭСЛЭЛГҮЙ"

Ц.Алтанзул "Монгол банк зургаадугаар сарын 12-нд "Тэтгэврийн зээлийг 50:50 хувийн нөхцөлтэй, ахмадуудад олгоно" гэсэн журам гаргасан. Энэ журам бидний амьдралд огт хэрэгцээгүй.

2020 онд Монгол Улсын Засгийн газрын хуралдаанаар хэлэлцэн шийдвэрлэсэн “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төсөл батлагдаж, зургаан сая хүртэлх тэтгэврийн зээлтэй ахмадуудын зээлийг төлсөн.

Түүнээс хойш таван жил өнгөрчээ. Гэтэл гэнэт ийм тогтоол гаргаж, худал мэдээлэл түгээж байгааг эсэргүүцэж байна.

Хоёрдугаарт, "Тэтгэврийн зээлийг хадгаламж эзэмшигчдийн мөнгөнөөс гаргаж байна" гэсэн. Тэтгэврийн сан хаачсан бэ? 1995 оноос эхлэн ажил олгогчийн цалингаас сар болгон шимтгэл суутгаж авч байна. Тэр хуримтлагдсан мөнгө хаана байна?

Мөн "Тэтгэврийн зээл 11.7 тэрбумын эрсдэлд орсон" гэж мэдээлсэн. Яагаад ч тийм байх үндэслэлгүй.

Учир нь зургаан сараас дээш тэтгэврийн зээл авахад батлан даагч шаарддаг. Гэтэл зээл авсан ахмад нь нас бараагүй байхад батлан даагчаас зээлийг нь төл гэж шаарддаг.Түүнчлэн ахмадуудыг нийгэмд сөрөг харагдуулахаар ташаа мэдээлэл цацдаг. Бид ч адилхан хүн шүү дээ.

Монгол Улсын гурван сая гаран иргэний нэг хэсэг болсон 400 мянган ахмадаа огт хүндлэхгүй, есөн хоног хүйтэн цемент дээр суулгаж байгаадаа ичих хэрэгтэй. Бид гаднын орны ахмадууд шиг сайхан амьдарч чаддаггүй.

Өнөөдөр ахмадуудын төлөөлөл УИХ-ын Нийгмийн бодлогын байнгын хороонд 72 цагийн шаардах хуудас өгсөн. Хэрэв бидний асуудлыг хаврын чуулганаас өмнө шийдэхгүй бол тэмцлийн дараагийн хурц хэлбэрт шилжинэ гэдгээ хатуу сануулъя" гэв.