Ой, хээрийн гал түймрийг унтраахад ашигласан зардлыг Засгийн газрын нөөц сангаас гаргана
Ой, хээрийн гал түймрийг унтраахад ашигласан зардлыг шийдвэрлэхэд Засгийн газрын нөөц сангаас 6.7 тэрбум төгрөг гаргахаар тогтлоо.
Засгийн газрын ээлжит бус хуралдаанаар ой, хээрийн гал түймэртэй тэмцэх, шуурхай хариу арга хэмжээ авахад шаардлагатай Онцгой байдлын албаны тусгай зориулалтын багаж хэрэгсэл, холбоо мэдээллийн техник тоног төхөөрөмж, туулах чадвар сайтай авто машин, гал түймрийн шалтгаан нөхцөл тогтоох шинжилгээний багажийн иж бүрдэл болон гал түймрийг унтраахад орон нутгаас зарцуулсан шатахуун, хоол хүнсний зардлыг нөөц сангаас гаргахаар шийдвэрлэв.
Энэ үеэр Сангийн сайд Б.Жавхланд салбар нэгжийг стандартад нийцүүлж нэмэх, тусгай зориулалтын хувцас, техник, тоног төхөөрөмж, багаж хэрэгслийг шинэчлэн сайжруулахад шаардагдах санхүүжилтийг 2026 оноос жил бүр улсын төсөвт тусган гамшигтай тэмцэх чадавхыг бэхжүүлэх, том оврын нисдэг тэрэг болон туулах чадвар сайтай авто машин, техникийн хангалтыг гадаад улсын зээл, тусламж, олон улсын төсөл хөтөлбөрийн санхүүжилтээр шийдвэрлэх асуудлыг судалж энэ оны дөрөвдүгээр улиралд багтаан Засгийн газрын хуралдаанд танилцуулахыг даалгав.
