ТАНИЛЦ: "ЭРЭЛ"-ИЙН Б.ЭРДЭНЭБАТЫН ГЭР БҮЛИЙН ГЭМТ ХЭРГИЙН ДУУЛИАНУУД
Цагтаа Монгол Улсын Их Хурлын гишүүнээр төр түшилцэж явсан Б.Эрдэнэбатын гэр бүлийн харгис хэрцгий явдлууд сүүлийн хэд хоногт биш сүүлийн хэдэн жил чих халууцуулж буй. Гэнэт л гараад ирчихсэн гэмт хэрэгтнүүд биш шүү дээ.
УИХ-ын гишүүнээс илүү “Эрэл”-ээр овоглогдсон Б.Эрдэнэбат гурван хүүтэй. Том хүү нь Э.Жаргалан, удаах хүү Э.Тэмүүжин харин бага хүүг нь Э.Тэмүүлэн гэдэг. Түүний том хүү Э.Жаргалан гадаадад мэргэжил эзэмшсэн боловсролтой нэгэн хэдий ч “Эрэл” дунд сургуульд байхаасаа л аавынхаа чихийг халууцуулж байсан. Сургуулийн багш нараа дээрэлхдэг “аятайхан байгаараа ажилгүй болгоно шүү” гэж дарамталдаг ёстой л баавар нэгэн байсан гэгддэг.
Их сургуулиа Америкт төгсөж эх орондоо ирээд ч түүний дуулиан дуусаагүй. Монголд ирсэн хойноо согтуугаар тээврийн хэрэгсэл жолоодож авто осол гаргаж цагдаагийн байгууллагад шалгагдаж байсан удаатай. Тухайн үед цагдаа нар Э.Жаргаланг эрэн сурвалжилж хайгаад олохгүй жил тойрсон нь мөн л олон нийтэд хардлага төрүүлээд байсан. Учир нь эрж хайгаад олохгүй байсан эрхэм нь хуучин хороо, дүүрэгтээ амьдарч байсан гэх дуулиан одоогоос нэлээд хэдэн жилийн өмнө дэгдэж байлаа.
Тэгвэл одоо Б.Эрдэнэбатын бага хүү Э.Тэмүүлэн ахаасаа дутахгүй аавынхаа чихийг халууцуулж аавын хаалга татах дээрээ тулаад байна. Хар тамхи хэрэглэж шөнийн цэнгээний газрын гадна бүлэглэн зодоон хийж хоёр хоног хоригдсон. Хохирогч нь нүдээ нээж чадахгүй хүнд байдалтай байхад цонхны цаана хөхрөн инээж суух түүнд хүн чанарыг хэлтэрхий ч цухуйсангүй.
Албан бус эх сурвалжийн мэдээлж буйгаар энэ хэрэг нь түүний анхны хэрэг биш гэнэ. Э.Тэмүүлэн нь 10 гаруй удаа зөрчлийн хэргээр цагдаагийн байгууллагад шалгагдаж байсан аж.
“Эрэл”-ийн Б.Эрдэнэбатын гэр бүлийн хар түүх үүгээр зогсохгүй. Хоёр хоногийн өмнөөс тэдний гэрийн үйлчлэгч учир битүүлгээр нас барсан гэх хэрэг сошиал орчинд сөхөгдөж эхлэв. Цахим орчинд цацагдаад буй мэдээллээр,
“ Б.Эрдэнэбатын эхнэр Д.Сэргэлэн нь гэрийн үйлчлэгчтэйгээ ёс бус харилцдаг, гар утас болон нөүтбүүк ашиглаж арга гэртэйгээ холбогдохыг зөвшөөрдөггүй байсан тул тэрбээр нууцаар хааяахан л гэрийнхэнтэйгээ ярьдаг байж.
Хамгийн сүүлд Террил Атиэнза 2011 оны арваннэгдүгээр сарын 13-ны өдөр том охин Ниррельтэйгээ утсаар холбогдсон бөгөөд “Ээж нь ирэх ирэх сард нутагтаа буцаж очно. Манай гэрийн эзэгтэй сүүлийн 3 сарын цалинг минь олгосонгүй” гэж хэлээд ор сураггүй болжээ.
Тэрбээр дөрвөн сарын турш Эрэлийн Эрдэнэбатын гэрт боолчлогдсон хэрнээ ар гэрийнхэндээ ердөө 184.37 ам.доллар л шилжүүлээд ийнхүү амь эрсэдсэн байна.
Энэхүү ноцтой хэргийг тухайн үед Эрэлийн Эрдэнэбатын гэр бүлийнхэн хав дарсан тул хэн ч мэдээгүй бөгөөд Филиппинд байгаа эр гэрийнхэн нь эсэргүүцэл илэрхийлж, тус улсын сайтад ганц нэг мэдээ нийтлэгдсэний дараа л Монголын хэвлэлд жижигхэн мэдээ хэрэг гарснаас хойш бүр таван сарын дараа л гарчээ.
Монголын шүүх эмнэлэг Террилд задлан хиймэгцээ үл мэдэгдэх хорт бодист хордон нас барсан гэсэн дүгнэлт гаргаад дотор эрхтнүүдийг нь тонож, цогцсыг нь 2011 оны 12-р сарын 09-ний өдөр Филиппин рүү буцаажээ.
Учир битүүлгээр амь эрсэдсэн иргэнийхээ араас Филиппин Улсын цагдаагийн байгууллага идэвхийлэн ажиллах гэсэн боловч амжилт олсонгүй. Ямартай ч тус улсын шүүх эмнэлэг цогцост нэмэлт задланг хийхэд талийгаачийн биед олон тооны цохилтоос үүдсэн шарх, хөхрөлт, бүр түлэгдэлтийн шарх ч олджээ.
Талийгаачийн ар гэрийнхэн Монголын бизнесмений гэр бүлийнхэн Террилийг минь зэрлэгээр харгислан зодож, зүрхэнд нь хутгалж амь насыг хөнөөсөн байх. Тиймдээ ч зүрхийг нь монголд авч үлдсэн. Мөн хөндий цээж болон амны хөндийд нь цагаан даавуу чихэж илгээсэнд нь гомдолтой байгаагаа илэрхийлж байжээ”
Эдгээр хэргүүдийнхээ төлөө Б.Эрдэнэбатын гэр бүлийн хэн нь ч ямар ч хариуцлага хүлээгээгүй. Өнөөдөр хүртэл түүний хүү Э.Тэмүүлэн сул чөлөөтэй явж байна.
Монголын хууль эрх мэдэлтэй, баян хүнд үйлчилдэггүйн жишээнүүд зөвхөн эдгээр жишээнүүдээр тогтохгүй юм.
