ТӨВ ЦЭНГЭЛДЭХ ХҮРЭЭЛЭНГИЙН ШИНЭ ЗАХИРАЛ Д.ЛХАГВАДУЛАМ ГЭЖ ХЭН БЭ?

Төв цэнгэлдэх хүрээлэнгийн захирлын албан тушаалыг хашиж байсан Ж.Энхжаргалан олон нийтийн сүлжээнд хэл ам дагуулсан пост оруулж улмаар лайвчин Д.Мөнх-Эрдэнэтэй зодолдсоноос үүдэн 9 хоног хоригдсон байдаг. Ингээд Ж.Энхжаргалан өөрийн хүсэлтээр ажлаасаа чөлөөлөгдсөн билээ.

Улмаар Төв цэнгэлдэх хүрээлэнгийн удирдах зөвлөл зургаадугаар сарын 25-ны өдөр хуралдаж “Төв цэнгэлдэх хүрээлэнгийн ХХК”-ийн шинэ захирлыг томилох асуудлыг хэлэлцсэн. Тус  хурлын шийдвэрийн дагуу Төв цэнгэлдэх хүрээлэн ХХК-ийн гүйцэтгэх захирлаар Дорждагвын Лхагвадулам томилогдож, албан үүргээ гүйцэтгэж байна.

ТЭГВЭЛ Д.ЛХАГВАДУЛАМ ГЭЖ ХЭН БЭ?

Д.Лхагвадулам нь их нууцлаг хүн аж. Олон улсын хайлтын систем болох Google-ээс түүний мэдээллийг шүүхэд ямар ч мэдээлэл олдсонгүй.

Төв цэнгэлдэх хүрээлэнгийн сайт дээр Гүйцэтгэх захирлын ажлаа хүлээж авахад нь нийтэлсэн мэдээнд дурдсанаар бол “Д.Лхагвадулам нь төрийн болон хувийн хэвшлийн байгууллагад олон жил удирдах албан тушаал эрхэлж, байгууллагын стратеги менежмент, бодлого төлөвлөлт, хэрэгжилтэд манлайлан оролцож ирсэн туршлагатай” гэжээ. Гэвч аль компанид ямар албан тушаал хашиж байсан нь тодорхой бус байгаа юм.

Манай редакци мэдээллийг тодруулахаар Төв цэнгэлдэх хүрээлэнгийн хэвлэлийн алба хариуцсан мэргэжилтэн н.Сүхбатаас тодруулсан юм.

-Танай шинээр томилогдсон захирал өмнө аль байгууллагад, ямар албан тушаал хашиж байсан?

-Мэдэхгүй.

- Тэгвэл утасны дугаарыг нь өгч болох уу?

-Өгөх боломжгүй байна.

-Ядаж цахим хаягийг нь өгч болох уу? Эсвэл очиж мэдээлэл авья?

-Фэйсбүүкийг нь ч мэдэхгүй байна. Захирал томилогдоод удалгүй наадам болсон учраас бид танилцаж амжаагүй байгаа. Би ээлжийн амралттай байна гэв.

Дашрамд дурдахад, Нийслэлийн өмчит компаниудын гүйцэтгэх захирлууд 2-9 сая төгрөгийн цалин авдаг. Тэдгээрээс хамгийн өндөр цалинг “Төв цэнгэлдэх хүрээлэн” ХХК-ийн Гүйцэтгэх захирал авдаг нь сарын 9 сая төгрөгийн цалин юм.