МУ-ын аварга П.Бүрэнтөгсийн одонтой гэргий Ч.Номин-Эрдэнэ гэж хэн бэ

Увс аймгийн 100 жилийн ойн баяр болж энэ өдрүүдэд нутгийн зон олон нь өргөн дэлгэр наадаж буй. Энэ үеэр Увс аймгаас төрөн гарсан нэрт дуучид, бөхчүүд монгол түмнийг огшоож байна.

Үндэсний бөхчүүдийн дундаа өндөр аварга нэрээрээ олныхоо хайр хүндэтгэлийг хүлээсэн бөх бол Увс аймгийн Давст сумын харьяат П.Бүрэнтөгс билээ.

Тэрбээр барилдахаасаа илүүтэй “Бүрэн монгол” төслийг 21 аймгаар хэрэгжүүлж, өргөө цагаан гэр бусдад бэлэглэх ажлыг амжилттай хийж дуусгасан нэгэн. Тэгвэл өндөр аваргын ар талыг бат дааж, хариуцлагатай эзэгтэй үүргийг сайн биелүүлдэг гэргийг нь танилцуулж байна.

Аваргын гэргийг Ч.Номин-Эрдэнэ гэдэг бөгөөд Хэнтий аймгийн Дархан сумын уугуул. Аваргын даруухан гэр гийгүүлэгч айлын ууган охин бөгөөд өдгөө дөрвөн хүүхэд тээж төрүүлж өсгөн хүмүүжүүлж байна. Тэрбээр 2022 онд эхийн алдар 2 дугаар одонгоо гардаж авсан билээ.  

Дашрамд сонирхуулахад аварга П.Бүрэнтөгс эхнэртэйгээ оюутны ширээнээс танилцаж, өдгөө хувь заяагаа холбосон өнөр өтгөн гэр бүл болсон байгаа юм.

Тэрбээр хэвлэлд өгсөн нэгэн ярилцлагадаа, “Бид хоёр чинь сонин учралаар бие биетэйгээ танилцсан. Есдүгээр ангидаа би Япон руу сумод явах гээд дээр дооргүй хөөцөлдсөн юм. Их аварга Асашёорюү Д.Дагвадорж мандаж явсан үе. УИХ-ын гишүүн Ц.Нямдорж гуай намайг сумоч болгох гээд их ч хөөцөлдсөн. Бүтээгүй л дээ. Би ч өсвөрийн барилдаанд байнга түрүүлээд сайн байсан юм. Гэтэл аав маань ирээд “Чи ингэж явсаар мэргэжил эзэмшсэн ч юмгүй хоосон хоцрох нь” гээд Батлан хамгаалахын их сургуульд оруулж өгсөн. Тэр үед гэргий маань бас л Японд сурах гээд бүтээгүй Батлан хамгаалахын их сургуульд долоо хоногийн зайтай хоцорч орж ирэв. Хойно өмнөө ширээнд суудаг байлаа. Их тусч охин байсан. Зан ааль сайтай. Тэгээд л бие биедээ дотноссон. Ханийн маань сайхан сэтгэл намайг татсан даа. Хүний сайхан сэтгэл гэж байдаг даа. Өдрөөс өдөрт бидний харилцаа гүнзгийрсээр 2010 онд анхны үрийн зулайгаа үнэрлэсэн. Охинтой болдог жилээ аймгийн арслан цол хүртэж байлаа” гэжээ.