Ц.Төрхүү: Шинэ цэвэрлэх байгууламжийг аравдугаар сард бүрэн ашиглалтад оруулна
Улаанбаатар хотын Ерөнхий менежер бөгөөд Захирагчийн ажлын албаны дарга Ц.Төрхүү мэдээлэл гаргалаа.
Тэрээр, 2025 оны аравдугаар сард бид хуучин цэвэрлэх байгууламжийн үйл ажиллагааг бүрэн зогсоож, шинэ төв цэвэрлэх байгууламжаа ашиглалтад оруулна. Шинэ төв цэвэрлэх байгууламжийн бүтээн байгуулалтын ажил 2020 онд эхэлсэн ч ковидын нөхцөл байдлаас шалтгаалан хоёр жил саатсан. Хэрвээ цар тахал саад болоогүй бол уг байгууламжийг бид гуравхан жилийн дотор ашиглалтад оруулах боломжтой байсан гэв.
1964 онд 500–800 мянган хүнтэй хотын хэрэгцээнд зориулан баригдсан хуучин байгууламж өнөөдөр 1.5 сая хүн амтай нийслэл хотод хүрэлцэхээ болиод удаж байна. Иймээс бид 2020 онд шинэ байгууламж барих ажлыг эхлүүлсэн. Анхны туршилтын усаа бид энэ жилийн наадмын өдрүүдэд авч, одоо бүрэн ашиглалтад оруулах шатандаа явж байна.
Шинэ цэвэрлэх байгууламж нь хоногт 250,000 м³ ахуйн болон урьдчилан цэвэрлэгдсэн үйлдвэрийн хаягдал усыг MNS:4943-2015 стандартын төвшинд хүргэж цэвэрлэх хүчин чадалтай.Тус байгууламж нь бохир ус цэвэрлэх, лаг боловсруулах гэсэн үндсэн хоёр технологиор ажиллах юм.
.Шинэ байгууламж ашиглалтад орсноор өмнө тулгардаг байсан үнэрийн асуудал мэдэгдэхүйц багасна. Нийслэлийн иргэдийн эрүүл, аюулгүй орчинд амьдрах нөхцөл сайжирна. Цаг минут тутам алт шиг үнэ цэнтэй энэ үед бид хугацаандаа багтаж дуусгахын төлөө ажиллаж байна.
Мөн ажиллах боловсон хүчнийг бид 2023 оноос тасралтгүй бэлтгэж байгаа. Зөвхөн 2024 онд л гэхэд дотоод болон гадаадын нийт 87 цагийн сургалт зохион байгуулсан.
2025 оны аравдугаар сард байгууламжийг бүрэн ажиллуулж эхэлнэ. Улмаар бүтэн жилийн турш техникийн туршилт, ажиллагааг жигдрүүлсний дараа Улсын комисст хүлээлгэн өгнө. Энэ өвлөөс өмнө шинэ цэвэрлэх байгууламж ийнхүү бодит ажил болон хэрэгжих гэж байна гэж тэрээр хэллээ.
