Унаач хүүхдийн цалин 400 мянгаас 1.5 сая төгрөг байна

Одоогоос хэдхэн жилийн өмнө уралдаанч хүүхдэд ууттай бэлэг хичээлийн хэрэгсэл цүнх зэргийг өгдөг байсан бол өдгөө тэдний хөдөлмөрийн хөлс багагүй нэмэгдсэн бололтой. Гэхдээ нөгөө талаар хүүхдийн хөдөлмөрийн мөлжлөг, унаач хүүхдүүдийн эрхийн асуудал одоо ч хөндөгдсөөр байгаа.

Тухайлбал,  ХЭҮК, олон улсын байгууллагатай хамтран хурдан морь унаач хүүхдийн өнөөгийн нөхцөл байдал, тулгамдаж буй асуудлын талаарх судалгааг оны эхээр гаргасан байдаг. Уг судалгаагаар,   хүүхдүүд эрх зүйн болон эцэг, эх, асран хамгаалагчийн ямар нэгэн хамгаалалтгүй унаач болж байгаа тохиолдол цөөнгүй байжээ.

Зарим тохиолдолд тэдгээр хүүхдүүд бие махбод, сэтгэл санаа, ёс суртахууны хүчирхийлэлтэй нөхцөлд ажил, хөдөлмөр эрхэлж, ажлын хөлсөө зөвхөн эцэг, эх, ар гэртээ зориулж, өрийн төлөөсөнд орж буй. Үүнээс гадна аймаг, бүсийн хооронд танихгүй айлд, удаан хугацаагаар морины ажил хийх, морь унах нь нөхцөл байдлыг улам хүндрүүлж байгаа нь ажиглагдсан байна.

Харин цалин хөлсны хувьд унаач хүүхдийн нэг сарын дундаж цалин 800-1.5 сая төгрөг байдаг гэнэ. Гэхдээ оролцож буй уралдаан, уяач нараас хамаарч янз янз.  Зарим уяачид 300-400 мянган төгрөг өгдөг бол зарим нь хамаатан садныхаа хүүхдүүдийг гуйж унуулах тохиолдолууд ч мөн элбэг аж.  Мөн хүүхдээр нь морь унуулсаар байгаад ар гэрт нь байр аваад өгчихсөн том уяач нар ч байдаг гэж зарим эцэг эхчүүд ярьжээ.