БНСУ-ын тэргүүн хатагтай асан Ким Кён Хиг баривчилжээ

Цэргийн онц байдал зарласан хэргээр шалгагдаж буй БНСУ-ын Ерөнхийлөгч асан Юн Сүк Ёлын гэргий Ким Кён Хиг хувьцааны үнэ албаар өсгөсөн, авлига авсан хэргээр баривчилжээ.

Тэргүүн хатагтай асан Ким Кён Хи өнгөрсөн мягмар гарагт болсон шүүх хурлын үеэр өөрийгөө гэм буруугүй хэмээн мэдэгдсэн ч шүүгч түүнийг хэргийн нотлох баримтуудыг устгаж болзошгүй гэсэн үндэслэлээр хорих захирамж гаргажээ.

БНСУ-ын төрийн тэргүүнүүд дунд шүүхээс ял авч, хоригдсон хэд хэдэн тохиолдол бий ч тус улсын түүхэнд экс ерөнхийлөгч нь гэргийн хамт хоёулаа хоригдсон тохиолдол байгаагүй аж.

Ерөнхийлөгч асан Юн Сүк Ёлын хувьд бослого үймээнд турхирсан хэргээр хоригдож байгаа билээ.

Прокурорын мэдэгдсэнээр Юн Сүк Ёлын гэргий 52 настай Ким Кён Хи БНСУ-д BMW компанийн автомашин борлуулагч Deutsch Motors компанийн хувьцааны үнийг албаар өсгөх хуйвалдаанд оролцож, 800 сая гаруй воны ашиг олсон хэрэгт буруутгаж байгаа аж. Уг хэрэг явдал нь Юн Сүк Ёл БНСУ-ын Ерөнхийлөгч болохоос өмнө болсон аж.

Түүнээс гадна Ким Кён Хиг Эв нэгдлийн сүмд бизнесийн давуу тал олгосны хариуд тус сүмийн пастороос Chanel брэндийн хоёр цүнх, очир эрдэнийн шигтгээтэй хүзүүний зүүлт авсан, 2022 оны парламентын нөхөн сонгууль болон 2024 оны парламентын сонгуулийн үеэр нэр дэвшигчдийг сонгох үйл ажиллагаанд хөндлөнгөөс оролцсон зэрэг хэргээр шалгаж байгаа аж.