Эцэг эхчүүд: 10 гаруй жил хичээсэн хүүхдүүдийнхээ хөдөлмөрийг хууль бус үйлдлийн өмнө сөхрүүлмээргүй байна
Боловсролын зээлийн сангийн сонгон шалгаруулалтаас хасагдсан хүүхдүүдийн эцэг эхчүүдийн төлөөлөл мэдээлэл өглөө. Боловсролын зээлийн сангийн шинэчилсэн журмын хүрээнд олон хүүхдийн материал шаардлага хангаагүй гэх үндэслэлээр хүчингүйд тооцогджээ. Эдгээр хүүхдүүд нь гадаадын нэр хүндтэй топ их, дээд сургуулиудад тэнцэж, журамд заасан баримт бичгээ бүрдүүлэн, материалыг цаг хугацаанд нь хүргүүлсэн байсан ч сонгон шалгаруулалтаас хасагдсан байна.
Бид эцэг эхийн төлөөллүүдээс дараах асуудлыг тодруулахад,
Эцэг эхчүүдийн хэлж буйгаар, Хүүхдүүдийн материал нь журамд нийцэж байсан бөгөөд тэд онгоцны тийзээ захиалж, суралцах бэлтгэлээ бүрэн хангаад байжээ. Гэюч Боловсролын зээлийн санд өгсөн материалын хариу тэнцсэн гэж ирсэн хэдий ч хоёр хоногийн дараа системийн алдаа гарсан байна та тэнцээгүй гэсэн хариу өгсөн аж. Энэ нь эцэг эхчүүдэд, тус байгууллага нь эгэл ардын хүүхдүүдийг Боловсролын сангийн зээлд хамруулахгүй ашиг сонирхлын зөрчилтэй гаргаж байна гэж үзэж буйгаа илэрхийлэв.
Тэд хэлэхдээ, “Миний хүүхэд Боловсролын зээлийн сангийн журмын дагуу дэлхийн топ шилдэг сургуульд тэнцсэн. Гэтэл тэргүүлэх бус мэргэжил хэмээн сонгон шалгаруулах эрхийг нь хассан. Журам дээр нь тэргүүлэх бус мэргэжилтэй бол боломжгүй гэж байгаа. Гэхдээ миний бие зохих журмын дагуу өргөдөл, урилгаа БЗСанд өгч хандсан байдаг. Гэтэл манай хүүхдэд тэргүүлэх бус мэргэжил учир болохгүй гэж хэлчихээд бусад хүнд давуу байдал олгосон. Яг адилхан хүүхдүүд 4, 5-аараа тэнцсэн байгаа нь шударга бус зүйл.
Тэрхүү тэнцсэн хүмүүс яаж, ямар мэдээлэл авсан байх вэ энэ нь өөрөө ашиг сонирхлын зөрчил. Би олон жил татвар төлсөн иргэн ийм хууль бус зүйлтэй хэзээ ч эвлэрэхгүй. Надад энэ өндөр сургалтын төлбөр төлөх боломж байхгүй. Чухамдаа улс бидний хүүхдүүдийнхээ сургалтын төлбөрийг хуримтлуулж буй хадгаламжаас хүртэл татвар авдаг шүү дээ. Тийм байж яагаад энэ хүүхдүүдийн суралцах боломжийг шударга, тэгш хүртээмжтэй олгож болохгүй байгаа юм. Үүнийг гайхаж байна” гэлээ.
Мөн мэдээлэл өгсөн хүмүүсийн дунд хөгжлийн бэрхшээлтэй иргэдийн эрхийн төлөө дуу хоолойгоо хүргэж ирсэн ээж ч байлаа. Монгол Улсын хуулиар, гадаадын топ 100 их дээд сургуульд тэнцсэн хөгжлийн бэрхшээлтэй иргэнд улсын зээлийн сангаас зээл олгох зохицуулалт бий. 2024 онд анх удаа хоёр иргэнд энэ төрлийн зээл олгосон байна. Гэвч бодит байдал дээр хөгжлийн бэрхшээлтэй хүүхдүүд боловсролын шат бүрт гадуурхагдаж байгааг нэгэн ээж хэлсэн юм. Энэ ээжийн хүү аутизмтай бөгөөд монголын сургуулиуд танай хүүг аюулгүй суралцуулах нөхцөл бидэнд байхгүй гэсэн шалтгаанаар хүлээн аваагүй байна. Тийнхүү хүүхдээ боловсрол эзэмшүүлэхийн тулд Австралид эгч рүү нь явуулж байжээ. Тэдэнд тулгарсан асуудал бол Монголд дээд боловсрол эзэмшээгүй гэх үндэслэлээр Боловсролын зээлийн сан зээл олгохоос татгалзсан байна.
Энэ жил гадаадын топ их сургуулиудад 17 хөгжлийн бэрхшээлтэй иргэн тэнцсэн ч, зөвхөн дөрөв нь л шалгарч тэдний ч тушаал шийдвэр одоогоор гараагүй юм. Үүний улмаас суралцах боломж нь тодорхойгүй болж, хүүхдүүд болон гэр бүлийнхэн нь гомдолтой байна. Мөн хөгжлийн бэрхшээлгүй хүүхдүүдийн материалыг онлайнаар авсан бол, хөгжлийн бэрхшээлтэй хүүхдүүдийг заавал биечлэн авчрахыг шаардсан нь ялгаварлал гэж үзэж байгаа юм.
