УИХ-ын гишүүн М.Нарантуяа-Нара ажлаа өгвөл 36-48 сая төгрөгийн тэтгэмж авна

Иргэний зориг ногоон намаас жагсаалтаар сонгогдсон УИХ-ын гишүүн М.Нарантуяа-Нара өнөөдөр бүрэн эрхээсээ татгалзаж буйгаа мэдэгдлээ. Тодруулбал, түүний гэр бүлийн салалтын талаарх мэдээллүүд сүүлийн үед олон нийтийн анхаарлын төвд байна.

Энэ үеэр УИХ-ын гишүүн М.Нарантуяа-Нара зохисгүй үг, хэллэг ашиглаж иргэдийн шүүмжлэлийг дагуулаад буй.

Тэгвэл УИХ-ын гишүүний бүрэн эрх ямар тохиолдолд дуусгавар болохыг хуульд хэрхэн заасныг тодотгон хүргэе.

Монгол Улсын Их хурлын тухай хуульд зааснаар, 9.1.Дараах тохиолдолд гишүүний бүрэн эрх энэ хуулийн 7.3-т заасан хугацаанаас өмнө дуусгавар болох үндэслэл болно:

9.1.1.Ерөнхийлөгчөөр сонгогдсон;

9.1.2.хүндэтгэн үзэх шалтгаанаар чөлөөлөгдөх хүсэлтээ өөрөө гаргасныг Улсын Их Хурал хүлээн зөвшөөрсөн;

9.1.3.хүндээр өвчилсний улмаас бүрэн эрхээ хэрэгжүүлэх боломжгүй болсон тухай эмнэлгийн дүгнэлт гаргасныг үндэслэн цаашид гишүүний бүрэн эрхээ хэрэгжүүлэх боломжгүй гэж Улсын Их Хурал үзсэн;

9.1.4.Монгол Улсын Үндсэн хуулийн цэц Монгол Улсын Үндсэн хуулийн Жаран зургадугаар зүйлийн 2 дахь хэсгийн 4-т зааснаар гишүүнийг эгүүлэн татах үндэслэлтэй гэсэн дүгнэлт гаргасныг Улсын Их Хурал хүлээн зөвшөөрсөн;

9.1.5.гишүүн гэмт хэрэг үйлдсэн болох нь хуулийн хүчин төгөлдөр болсон шүүхийн шийдвэрээр тогтоогдсон;

9.1.6.нас барсан.

Дахин нэг хуулийн заалтыг онцлоё, УИХ-ын гишүүн ажлаа өгсний дараа 36-48 сая төгрөгийн тэтгэмж авдаг. Тодруулбал,

41.9.Хэрэв гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж, гишүүнээр сонгогдохоосоо өмнө оршин сууж байсан газартаа шилжвэл өөрийнх нь болон гэр бүлийн гишүүний замын зардал, ачаа, тээшний хөлсийг авто тээврийн тарифаар тооцож олгоно гэх заалт бий.  Монгол Улсын Их хурлын тухай хуульд орсон эл заалтыг анх 1997 онд суулгаснаар хэрэгжүүлж иржээ.  Гэхдээ анхны баталсан хуульд бүрэн эрх нь дууссан гишүүнд зургаан сарын хугацаатай тэтгэмж олгохоор заасан байна. Харин 2006 онд Монгол Улсын Их хурлын тухай хуульд өөрчлөлт оруулахдаа 12 сар болгон хугацааг нь сунгажээ. Үүнээс хойш дээрх хуульд хоёр ч удаа гар хүрсэн ч тэтгэмж олгох заалтуудыг хэвээр нь үлдээж хэрэгжүүлсээр өнөөдөртэй золгосон байдаг.

Нэг ёсны ажилгүйдлийн тэтгэмж гэж ойлгож болох энэ заалтыг хууль тогтоогчид 12 сараар авахаар хуульчилсан нь өөрсөддөө давуу байдлыг бий болгосон ч гэж үзэж болох талтай.

Учир нь, ажил хөдөлмөр эрхэлж байгаа иргэн ажлаасаа чөлөөлөгдвөл гурван сарын дундаж хөдөлмөрийн хөлс, орлогоос төлсөн хугацаанаас хамааран 45-70 хувиар ажлын 76 өдрөөр тооцон ажилгүйдлийн тэтгэмж Нийгмийн даатгалын сангаас авдаг.

Хэрэв УИХ-ын гишүүн М.Нарантуяа-Нара ажлаа өгвөл түүнд дээрх хууль үйлчлэх нь дамжиггүй бизээ.