Ерөнхий сайд асан Л.Оюун-Эрдэнийн ээж нууцлаг хатагтай Лувсаннамсрайн Даваасүрэн гэж хэн бэ?
Ерөнхий сайд асан Л.Оюун-Эрдэнийн ээж Л.Даваасүрэн олон нийтээс тун чиг нуугдмал нэгэн. Төрүүлсэн хүү нь төрийн түшээ болсон хугацаанд хүүтэйгээ хамт авхуулсан нэг ч зургаа сошиалд оруулж, хамт явж харагддаггүй нь түүнийг хэр нууцлаг болохыг илтгэнэ. Монгол Улсыг донсолгосон түүний ач хүүгийн их шуугианаар ч эмээ нь таг чиг байсан юм.
Л.Оюун-Эрдэнийн ээжийг Лувсаннамсрайн Даваасүрэн гэдэг. Хэнтий аймгийн Батноров суманд төрсөн бөгөөд түүнийг 6 сартай байхад нь Лувсаннамсрай гуай үрчилж авч байжээ. Ээжийг нь үрчлэн өсгөсөн энэ буурал Л.Оюун-Эрдэнийг ч мөн дэргэдээ авч, өөрөөрөө овоглон эрийн цээнд хүргэжээ.
Л.Даваасүрэн нь Хөгжим бүжгийн сургуулийг хөгжимчин мэргэжлээр төгссөн, Сонгодог урлагийн академик театрт кларинет хөгжим тоглодог байж. Гавьяаны амралтаа авсныхаа дараа Монголын сонгодог урлагийн хөгжилд хувь нэмрээ оруулахыг зорин “Соёл” санг үүсгэн байгуулсан. Түүнийг найз нөхөд нь ихэд эгэл даруу, элгэмсэг эмэгтэй хэмээн магтдаг.
Сонирхуулахад, “Чингис хаан” киноны гол дүрийг бүтээсэн АЖ А.Энхтайван гуай, Л.Даваасүрэн нар нэг нутаг усных төдийгүй нэг ангийн найзууд бөгөөд одоо ч ихэд дотно харилцаатай байдаг байна. Хамтран нэлээн хэдэн уран бүтээлийн ард ч гарчээ.
