Л.Оюун-Эрдэнийн 30-ийн бүлэглэл хэр амь бөхтэй оршин тогтнох вэ?

Сүүлийн 30 гаруй жилийн түүхэнд хамгийн удаан Ерөнхий сайдаар ажилласан хүн бол яах аргагүй Л.Оюун-Эрдэнэ. Тэрээр сайн ахынхаа хүчээр нам төрийг хослон барьж байхдаа өөрийн бүлэг фракцийг ч бий болгож чадсан. Энэ нь улс төрч тэр дундаа манлайлагч хүний хувьд зайлшгүй хийх ажил. Гэхдээ түүний бүрдүүлсэн бүлэглэл хэр амь бөхтэй байж чадах эсэх нь харин эргэлзээтэй асуудал.

Ингээд ЛО бүлэглэлд хэн хэн багтаж байгааг танилцуулъя.

Шашин төрийг хослон баригч гэдэг шиг нам төрийг хослон баригч ЛО-г буусны дараа №1-ийн хүсэлтээр экс спикер Г.Занданшатар Ерөнхий сайдын суудалд заларсан. Харин энэ үйлдэл мэдээж МАН-ын залуусын төлөөлөл тэр дундаа 80-аад оныханд талагдаагүй тул хамгийн түрүүнд ЛО-ийн нэлээн сайн “дарж” нууцалж байж парламентын босго алхуулсан нөхөд ил гарсан гэхэд болно. Хууль тогтоогч болгосны хариуг толгойлогчдоо барьж шинэхэн Ерөнхий сайд Г.Занданшатар, шинэ засгийг дориун хөөрхөн бойкотолсон.

Үүнд:

Э.Болормаа
Х.Булгантуяа
Ч.Номин
О.Номинчимэг
Ж.Алдаржавхлан
Н.Алтаншагай
Ч.Анар
А.Ариунзаяа
Х.Баасанжаргал,
О.Батнайрамдал
Б.Бат-Эрдэнэ
Б.Баярбаатар
Ж.Галбадрах
Д.Ганмаа
М.Ганхүлэг
Х.Жангабыл
П.Зулпхар
Г.Лувсанжамц
М.Мандхай
Д.Рэгдэл
П.Сайнзориг
О.Саранчулуун
Л.Соронзонболд
Г.Тэмүүлэн
Б.Уянга
Д.Үүрийнтуяа
Б.Хэрлэн
С.Эрдэнэбат нарын 28 гишүүн гарын үсгээ зурж, өргөх бичиг барьсан. Үүн дээр нэмээр Чингэлтэйн Засаг дарга асан Ч.Батсүмбэрэл, Дорнодын М.Бадамсүрэн нарыг нэмээд ЛО-гийн 30-ийн бүлэглэл хэмээн нэрийдэж байгаа.

Тэгвэл тэдний хэн нь хэн бэ гэдгийг товч танилцуулвал:

Эдэн дунд УИХ-д шинээр бүрэлдэн бий болсон “нийслэлийн” гэх тодотгол бүхий хотын мэр Нямбаагийн хүмүүс багтаж байгаа. Түүнийг сайдын суудлаасаа бууж нийслэлд очиход нь дагалдаж очсон П.Сайнзориг, О.Номинчимэг, Сонгиноос авахуулаад сүүдэр шиг дагасан Н.Алтаншагай, Нямбааг дагасных нийслэлийн засаг захиргааны бүтцийг өөрчлөх олон жилийн хүслээ ажил болгож, авторлож гаргасан Ж.Алдаржавхлан нарыг онцолж болно.

Тоон дотор үсэг гэдэг шиг УИХ-ын дэд дарга Х.Булгантуяа, УИХ-ын дарга Д.Амарбаясгалангийн дагуул гэгдэх Ерөнхий сайд П.Жасрай агсаны зээ охин, Ардын намын Ариунаа гэж өөрийгөө нэрийдэж явсан ХНХ-ын сайд асан А.Ариузаяа нар сондгой байсан гэдгийг энд дурдах ёстой. Эндээс үзвэл АБ зарим талаараа Л.Оюун-Эрдэнэтэй санал нэгдэж, гар барьсан ч юм шиг.

Цаашилбал Л.Оюун-Эрдэнийн бүхнээс нуун жагсаалтандаа авч орж ирсэн жагсаалтын №1 Г.Лувсанжамцийн тухайд Японд боловсрол эзэмшсэн, хот төлөвлөлтөөр ажиллаж байсан зэрэг нь түүнийг өнгөлдөг. Араас нь салбар бүрийн төлөөлөл гэгдэн жагсаалтад суусан гишүүд, тухайлбал, ахмадын төлөөлөл Д.Рэгдэл, хөгжлийн бэрхшээлтэй иргэдийн төлөөлөл О.Саранчулуун, хүний эрхийн дуу хоолой Х.Баасанжаргал, бизнесийн салбараас улс төрд орж ирсэн шарк, лэнд.мн захирал асан Ч.Анар, Б.Хэрлэн, Д.Ганмаа, М.Мандхай нар бодож санах юмгүй ЛО-гийн талд гараа өргөсөн.

Залуусын төлөөлөл гэгдэх, өмнө нь ХХААХҮ-ийн дэд сайдаар ажиллаж байсан М.Ганхүлэг, Үйлдвэрчний эвлэлийг төрд төлөөлж буй С.Эрдэнэбат, МАН-ын намын байгуулалтын газрын дарга, Хяналтын ерөнхий хорооны дарга зэрэг МАН-ын амин гол судсыг атгаж ирсэн Б.Баярбаатар, мөн ЛО Засгийн газарт хоёронтоо сайдын суудалд тухалсан Ч.Номин, БОАЖ-ын сайд асан, нэгэн үе НАМЗХ-ын генсекээр ажиллаж байсан төдийгүй 2020 оны Л.Оюун-Эрдэнийн сонгуулийн ерөнхий менежерээр ажилласан “пороро” Б.Бат-Эрдэнэ, ХНХ-ын дэд сайдаар ажиллаж байсан П.Зулпхар, УУХҮ-ийн дэд сайд асан Б.Уянга, боловсролын салбарын төлөөлөл гэгдэх боловч бэл бэнчингээрээ жагсаалтад суусан Ж.Галбадрах зэргээс гадна тойргийн бялуу хүртэн намын рейтингээр ялалт байгуулсан “Сод Монгол” групийн Эрдэнэт хот дахь шатахуун түгээх станцын эрхлэгчийн ажлаас “Эрдэнэт” үйлдвэрийн санхүү эрхэлсэн орлогч захирал хүртэл дэвшсэн Д.Үүрийнтуяа, цөөнхийн төлөөлөл болсон Х.Жангабыл, ЛО өөрийн тойрогт хамт нэр дэвшсэн М банкны гүйцэтгэх захирал асан Л.Соронзонболд, нэгэн үе хунтайж нар, ардын хүүхдүүд гэгдэж талцан хуваагдаж байсан НАМЗХ гэх ах намын залгамж халааг бэлтгэх гол байгууллагыг удирдаж асан, УИХ-д гурвантаа сонгогдсон хуучин хотын фракц буюу Энхболдын даргын бүлэгийн төлөөлөл болсон Уул уурхайн дэд сайдаар ажиллаж байсан, Эрдэнэт үйлдвэрийн захирал Ч.Ганзоригийн хүү Г.Тэмүүлэн, мөн ЛО-г тодотгодог хамгийн чухал пиар болох Харвардын малгайд багтан Н.Учралын далбаан дор нийслэлээс сонгогдсон О.Батнайрамдал, хамгийн сүүлд Л.Оюун-Эрдэнийн ахлах зөвлөхөөр ажиллаж байгаад сонгуулиар тооноор буучихдаг Э.Болормаа нар бол ЛО бүлэгт багтаж байна.

Өдгөө энэ бүлэг тоогоо нэмж УИХ-д 65 суудал авсан МАН-ын бүлгийг дотор нь хувааж, тарамдуулах №1 шүдний өвчин болоод буй. Эдгээрээс чухам хэд нь энэ зун том ахын бүлэглэл рүү гулсаж, шарваж орсноос бас их зүйл шалтгаална. Ямартай ч Ч.Номин, Э.Болормаа тэргүүтэй эмэгтэйчүүдийг нь “гөвших” замаар ахын зүгээс анхааруулга өгөөд эхэлчихсэн байгаа. Энэхүү нөхцөл байдлыг харж, ялсан талд тугаа өргөе хэмээн сэтгэлээ хувиргаж мэдэх нөхөд ч бий.

Намрын улс төр халах нь ээ.

Х.Бат