Э.Бат-Амгалан: Ирэх 2026 онд болох монголын барилгын салбарын 100 жилийн ойн хүрээнд салбарын хөгжил шинэчлэлийн стратегийн эргэлтийн цэг болгоно
Барилгын салбар үүсэж хөгжсөний 99 жилийн ойд зориулсан “Барилгачдын өдөр-2025” арга хэмжээ өнөөдөр боллоо. Тус арга хэмжээг нээж Хот байгуулалт, барилга, орон сууцжуулалтын сайд Э.Бат-Амгалан үг хэлэв.
Тэрбээр ярианы эхэнд “Барилга бол зөвхөн барьж байгуулах биш, хүн амын амьдрах орчныг тодорхойлж, орон сууц, ажлын байр, нийтийн үйлчилгээ, дэд бүтцийн хүртээмжийг шийдэх төр, хувийн хэвшлийн хамтын бүтээл” гэдгийг онцоллоо.
Түүнчлэн "Барилгын тусгай зөвшөөрлийн үйл ажиллагааг license.mn системд буюу E-mongolia-д өнөөдрөөс эхлэн бүрэн шилжүүлж байна. Ингэснээр тусгай зөвшөөрөл авахад дунджаар 21 хоног зарцуулдаг байсан бол 3 хоногт багтаан тусгай зөвшөөрлийг авах боломжууд бүрдэж байгаа" гэв.
ХББОС-ын сайд Э.Бат-Амгалан "Ирэх 2026 онд Монголын барилгын салбар 100 жилийн ойтойгоо золгоно. Энэ түүхэн ойг бид зөвхөн тэмдэглэлт үйл явдал төдий бус, салбарын хөгжил, шинэчлэлийн стратегийн эргэлтийн цэг болгоно" гэдгийг онцлон дурдаад салбартаа хийж, хэрэгжүүлэхээр төлөвлөж буй ажлуудаа танилцууллаа.
-Хууль эрх зүйн шинэчлэлийг хийж Барилгын ерөнхий хууль, Хот байгуулалтын тухай хууль, Орон сууцны ашиглалтын тухай хуулийн шинэчилсэн найруулга,Үндэсний орон сууцжуулалтын тухай Барилгын салбарын багц хуулийн төслүүдийг боловсруулан батлуулахаар ажиллаж байна. Дээрх хуулийн төслүүдээс Барилгын ерөнхий хууль, Хот байгуулалтын тухай хууль зэрэг салбарын хуулийн төслүүдийг Намрын чуулганаар батлуулах ажлыг зохион байгуулна.
-2025 оны 12 дугаар сард багтаан зураг төслийн магадлалыг цааснаас бүрэн салгаж, IFC болон PDF өргөтгөлөөр хүсэлтийг авч, цахим системд шилжүүлнэ.
-“Барилгын материалын үйлдвэрлэлийг дэмжих хөтөлбөр”-ийг боловсруулж, 9 дүгээр сард Засгийн газарт өргөн мэдүүлнэ.
-Орон сууцжуулалтын банк байгуулах ажлыг эхлүлж, урт хугацааны хямд эх үүсвэрээр орон сууцны санхүүжилтийг тогтворжуулах механизмыг бүрдүүлнэ.
-Дулаалгын барилгын материал, түүхий эдийг НӨАТ-аас чөлөөлөх хуулийн төслийг 9 дүгээр сард багтаан Засгийн газарт танилцуулж, энэ онд багтаан шийдвэрлүүлнэ.
-Дээрх арга хэмжээнд төрийн болон төрийн бус байгууллага, 21 аймгийн ААН байгууллагын удирдлагууд болон салбарын инженер техникийн ажилчид оролцсон юм.
