Ерөнхий сайд Г.Занданшатараа таны Засгийн газрынхан төрийн албыг “өөрийн алба” болгож байна

Байгаль орчин уур амьсгал, өөрчлөлтийн сайд Б.Батбаатар ах дүү, хамаатан саднуудаа Байгаль орчин уур амьсгалын өөрчлөлтийн яаманд, түүний харъяа газруудад чихсээр байна. Тухайлбал тус яамны Байгалийн нөөцийн бодлогын газрын дарга Ц.Уранчимэгийг тусгай хамгаалалттай газрын даргаар шилжүүлэн зайлуулж, түүний оронд өөрийн үеэл болох Мал аж ахуйн хүрээлэнд “хэлтсийн дарга” хийж байсан Т.Балжинням гэгчийг Байгалийн нөөцийн газрын даргаар томилжээ.

Эмээлтэд мах чанаж идсэн Мэргэжлийн хяналтын дарга асан Т.Балжиннямыг томилсон даруйдаа “зэрлэг амьтан агнах”, хуш модны “самар”-ын зөвшөөрлийн тушаал яаравчлан гаргаж, мөнгө олох ажилдаа “ханцуй шамлан” оржээ.

Сайд Б.Батбаатар нь Баянгол дүүргийн АН-ын хорооноос улс төрийн карьераа эхлүүлсэн учраас АН-ын журмын нөхдөө ч, ажлаа өгсөн АН-ын С.Одонтуяа сайдын заавар зөвлөгөөг, мөн түүний БГД-т дүүрэгт байхдаа үзүүлсэн “АЧ” санаж, салбарын ажлыг үндсэнд нь бүрэн унагаж байна. Чадварлаг цомхон багаар ажиллах гэсэн Г.Занданшатарын кабинетын мөрөөдөл энд хүрээд замхарч байна. Мэргэжлийн бус, чадвар мэдлэг байхгүй хүний нөөцгүй намтай хамтарсан хариуцлагыг хэн үүрэх ёстой вэ?

Салбарын мянга мянган албан хаагчид, цомхотгол, төсвийн алдалдлыг бууруулах нэрийн дор бүтцийн өөрчлөлтөөр ажилгүй болж байгаа мэт боловч, олон жил гэртээ байсан энэ намын даргын ах дүү найз нөхөд цэнзүүргүйгээр түр орлон гүйцэтгэгч нэрийн дор энэ салбарт шургалж байгаа нь төрийн албаны ёс зүй, мерит зарчмын алдагдуулж, төрийн байгууламжийн тогтвортой байдлыг алдагдуулж байна. АН-аас УИХ-ын гишүүн асан, Эгийн голын усан цахилгаан станцын төслөөр хаяглагдаж байсан Д.Одхүүг өөрийн “орон тооны бус” зөвлөхөөр ажиллуулж, тус яамны дотоод ажилд хутгалдуулж, тендер төслийн асуудлаар дагнуулан ажиллуулж байна. Орон тооны бус учраас АТГ-д хянагдахгүйгээр бүх асуудлыг хийхээ зарлаж байгаа Д.Одхүүд орохгүй ажил, мэдэхгүй зүйл энэ салбарт байхгүй болжээ. АН-ын нөхдүүдийг ажилд авч хуучин сайд С.Одонтуяагийн “захьсан” хүмүүсийг ажлаас халахгүй үлдээн, өөрийн намын гишүүдээсээ илүү үзэж байгаад ИЗНН-ын гишүүд нь Б.Батбаатарт ихэд бухимдаж, нам дотроо хэрүүл, шуугиан ихтэй яваа гэнэ.