Халуун сэдэв: Гашуунаар унасан Л.Оюун-Эрдэнийн эргэн ирэлт!
Намрын улс төр буцалж эхэллээ. Өнөө маргаашгүй их хурлын чуулган нээгдэх гэж буй энэ мөчид УИХ-ын дарга Д.Амарбаясгалан МАН-ын даргад өрсөлдөнө гэдгээ зарлалаа.
Хэд хоногийн өмнөөс л Ерөнхий сайд асан Л.Оюун-Эрдэнэ Б.Амарбаяcгаланг, харин Ерөнхийлөгч У.Хүрэлсүх одоогийн Ерөнхий сайд Г.Занданшатарыг МАН-ын даргад сойж баруун, зүүн өврийн энгэрээр уулзаж байгаа талаар мэдээлэл хүчтэй өрнөөд байв. Тодруулбал, Л.Оюун-Эрдэнэ Д.Амарбаясгалангийн хамт Архангайд уулзалт зохион байгуулсан. Араас нь У.Хүрэлсүх, Г.Занданшатар хоёр Их тэнгэрт НАМЗХ тэргүүтэй намын “хөл”-үүдээ цуглуулсан гэх мэдээлэл хөвөрсөн.
Угтаа намын дарга нь Ерөнхий сайд байх дүрмээрээ Г.Занданшатарт МАН-ын даргын тамгыг өгөх чиглэлд Ерөнхийлөгчийн институт анхаарч буй. Харин үүнд Л.Оюун-Эрдэнэ яаж сөрөх юм, эсвэл өнгөрөөх үү гэдэг сонин байв.
Гэтэл өнөөдөр Д.Амарбаясгалан МАН-ын даргад өрсөлдөхөө зарласан нь утгаараа зарлаагүй дайны оршил боллоо.
Л.Оюун-Эрдэнийн эрх мэдлээ хадгалж үлдэх боломж нь Д.Амарбаясгалан гэж харж, тооцсон байх. Тиймээс ч намын даргын сунгаанд оролцохыг ил, далдаар шахаж буй гэх хэвлэлийн мэдээ оргүй хоосон сэвээ биш нь тодорхой. Сэвээ болгоны цаана хэн нэгний нууцхан ашиг сонирхол нуугдаж байдаг нь ч гэм биш.
Одоо МАН-ын хурлын товыг Л.Оюун-Эрдэнэ зарлаж ширүүхэн өрнөл үргэлжлэх нь.
М.Үүрийнтуяа
